أحداث ومواقف طريفه أيام الطفولة والشباب

07-08-2008, 05:26 AM

HI

أحدآث وموآقف طريفه... وصلت لي بالإيميل حبيت تفرفشون فيهآ معي

بذكرلكم قصــص ايام الشباب...

صارت لي من 7 سنوات وماراحت عن بالي

يوم كنت بثالث متوسط

كان مشهور عني ان صوتي زين وأنا اقرأ قرآن

الموهم

جيت هذاك اليوم متأخر عن المدرســه

قالي المدرس وأخيرا جيت بسرعه حط شنطتك وروح عندنا اذاعه ونبيك تقرأ

على طول بدون استعداد بدني أو عقلي

طلعت المسرح

المقدم: صباح ليس ككل الاصباح وأذاعة ليست ككل الإذاعات...إلـخ
أما الآن مع قرآآن كريم والطالــب ديدغ

وأطلع أنا وكنت حاطن ببالي أني بقرأ صورة العصــر

ويوم جيت أبقرأ خلاص

قررت اني أقرأ صورة الناس أسهــل

وأغمض عيوني قالكم خشوع

وأبدأ
بعد البسمــله

والناااآآآآااااس

حسيـــت أني قلــت شــي غلــط

قام المدرس اللي وراي يصححلي

قمت هونت قلت بقرأ صورة العصر بما أني مجهزها من قبــل

قلت

قل أعوذ برب العصــر !!

حسيت اني غلطان بقوه

قمت اسمع صوت صراصير الليل من قوة الربكه

الطلاب اللي كانوا مفهين صحصحوا على ذا اللي قاعدن يخبط

المدرسين كلهم احسهم ودهم يلعنوني

انا هنا توهيقه مابعدها توهيقه

قام اللي وراي صححلي وأكمل الصوره طبعا وانواع الأغلاط اللي بالسوره لكن يالله لاتؤاخذنا

-------------------------

(( في المجلــــــــس التسبير ))

تتيرااا تتيرراات تاررراااررر اللي بتأصر التنوره واللي بتأصر التنوره تلحقها عيون الشباب

هييييييييييييييييييييييييييييييييييه (وجه واحدن لابسن عمامه وشنبه مكنسه تسنه واحد من باب الحاره )

وهي بحالها مغروره وهي بحالها مغروره <<<<<يالبيه يافارس كرم عليك اغاني انما ايه

كانت هذي نغمة جوال ترن في وسط المجلس التسبيييييير وكان متروس ترس حريم اشكال والوان المتدينات

و الداعيات والعجايز المتصفطات وماننسى الزينات <<احم احم

الا ويرن جوال الجليلة الحياء بنت اخوي حاذفتن شنطها وجوالها في الجهه الثانيه و مشخصتن جنبي

هي وحواجبها اللي تسنه صلصال من رن الجوال وانا على طول عرفت انه جوالها

انا حمر وجهي وهي قامت تبلع ريقها من الخوف والحريم اللي تتلاقطت عيونهم مرتن يمين ومرتن يسار

يبون بس يقفطون صاحبته عاد لو استلموها هات يانصايح ولااااااااااااه بعد شوفو كلمات الاغنيه

تقصررر تنوره بتلاحقها عيوون الشباب والله كملت الجريمه عاد تسانت في وحده من قرايبن مانعايرها

الا الطرمه لان قبلها ساكته حتى لو كانت مظلومه تسكت المهم كانت الشنطه جنبها وتلفتوا الحريم

يناظرونها عااااااااااد سبحان الله بقدرت قادر نطقت هذاك اليوم <<<<<<<والله من قوة الجريمه

تدرون وش قالت

قربوا

قالت :لالالا موب شنطتي وقسم هذي شنطة ريمــا

المهم الحريم تناظروا وانا جنبها ياخزيااااااااااااه يعني اللتمستني الشبهه معها وكانت وحده مدينه جالستن

جنبها قامت تنصحها جزاها الله خير عاد قالت ريما اخوي اللي حطها لي <<<<<<ابو التسذب بعد

ماتعوق معها المخارج على عمتها ذيبه عاد يوم طلعنا نتعشي قلت قصم لو اشوفتس جالستن جنبي

عطيتس تسف يعدل منابت شعرتس <<<<<<<ايه ايه يالقويه

--------------------------

(( فــــــي السوووق ))

وبرضوا مرتن من المراريت نشبت في مامي الا ابي هالبلوزه شفتها من برى وخقيييييييييييت الا اشتريها

قالت الوالده بعدين تاخرنا ورانا مشوار وانا راسي ناشف ابيها يعني ابيها

المهم قالت عجلي علي خذها واطلعي يانكبه واجيكم وصافطه الطبلون بدخل انا عى بالي باب المحل مفتوح

مادريت الا بووووووووووووووووووووووووووم ذيك الصقعه الا رجعتني ورى مترين

وهز القزاز واتمقل زين لقيت الباب مصكوك ومن النظافه الزايده والتلميع ما انتبهت له واسمع ضحك الناس

والوالده تسمي علي وفيها الضحتسه وراعي المحل شكله قمط وفي ذاته يقول

عسى بس ما كسرتي باب محلي

--------------------------------

مره من المرارير مودي الماما لبندهـ وزي ما انتي عارفه بنده تغتص بالحريم مسوين انهم يتسوقون وهم من جنبها

نزلت امي واخواني وانا جلست بالسياره لاني توني قايم من النوم والا شوي ويخبط واحد القزاز حق السياره

واناظر بغيت انزل عليه واكوفنه لانه خرب علي احلامي السعيدهـ بس الحمد الله صار اخوي الصغير احمد قالي امي تبيك

ضروري وفقع راح ما علمني هو وينها فيه وانا اللي انزل من السياره متثاقلاً المشي داخل وسط بنده واتلفت يميناً وشمالاً

ولم ارى الوالده الله يخليها لي قولو امين يا مال الوجع

المهم واقعد ادور عليها بين الاسياب والا القاها وانا اللي امشي تلليون واقولها وش بغيتي والا تلتفت علي بنظرات حقد

انا اول شي قمت العافيه يؤ امي تناظرني تسذا وتمشي وتخليني واقولها يا بنت الحلال ترا ما فيني حيل اخلصي

وش تبين وكل مالها تتزيد سرعتها وانا اللي ارجع النمره الثانيه <<< عطوه جوه تحمس

يوم وصلت يمها وانا اللي امسك كتفها اقولها وش فيك وما دريت الا الشنطه جايه تمشي ارض جو واسرع من الضوء

واللي استقبلها خشتي الموقره وفي هذي اللحظه عرفت انها مهيب امي صارت لبسه نسخه من عباية امي

ونفس النقاب ونقاب متدينات قسم بالله يروع واول ما جت الشنطه في خشتي >>> احس انها حاطه كلش في

شنطتها او انها سارقه من بنده
واول ما صكتني وانا اللي احط يدي على خشتي وعلى طول طحت على الارض واناظر يدي والقاها كلها دم

وتقعد تناظرني وتهاوش واقولها اقول انقلعي لجي والعن خير يا....... >>>مشفر

والمشكله بنت الايه ما عبرت فيني صب دم ولا ما صب عادي عندها والا العالم اجتمعت علينا وشوي ويتوطون في بطني

يحسبوني اعاكسها >>>> والله لوني حمار عاكستها >>من جاب طاري ابو نواس

والا تجيك امي وتدخل بين الجمهور وتناظرني وتقول من طقك قلت هذي اللي وراك وقامت عليها امي بتلعن خامسها يوم

التفت عليها امي والحرمه ناظرت امي قامت تصيح لانها درت اني غلطان وان عبايتها تشبه عبايت امي العزيزه

ما يستفاد من التفشيله :-

اذا وديت امك لسوق حط عليها خط او اي علامه عشان تعرفها او يا مال الوجع انزل معها من اول ما تفتح الباب

------------------------------

((( فشيله السوق )))

الله يسلمكم هالمره كنت بالسوق طالعه انا وامي واختي الصغرى .

المووهم كنا نمشي وندوج من محل لـ محل لا ذا زين لا ذا شين ذا كبير ذا صغير ذا قصير ذا كبير >>> الجمل الخاصه بالتسوق

واثناء دوجاناا انا وامي والقشراء اختي , دخلنا دبنهااامز طبعاً ما يحتاج اوصف كبره يضيع بصراحه,

دق الجوال وطلع ابوي رديت عليه وسألني انتي وين عشان يبي يجي لمنا , وصف له المكااان وقال اذا دخل المحل

بيدق قلت طيب , ما كمل 10 دقاايق الا ويدق مره ثانيه يقول انا دخل المحل تعالي عند الباب ( مسكين خاف

يضيع من كب المحل ) رحت عند الباب وقعدت احوس بالمكياجات اللي حول الباب الين اشوفه

دخل هو وما انتبة له الا يوم تعداني عاد انا لمحت زززوله من ورا ولحقته وشفته سك الطريق الخاطئ

اسرعت الين وصلت له ومسكت يده وانا اقول له ما شاء الله مسرع كأنك تعرف الدرب تعاال امي

عند خلاقين البزران مهب هنااا وطبعاً كل هالكلام وانا ماسكه أيده تنحنح بصوت شوي عالي

وألتفت بشووف وش فيه وكاااانت الصدمه الكبرى يوم ألتفت تمنيت الارض تنشق وتبلعني ولا انحط

بهالموقف ترك ايده بسرعه وطلعت من المحل مدري وين اروح اهج افرك مدري وين انقلع له

وانا امشي واسب بروحي انا غبيه وشوله ما ناظرت بوجهه يوم مسكته و ....و....و....و الخ

والرجال المسكين مهب مستوعب اللي صاير بنت تمسك يده والله قويه

ولا اللي كمل الناقص اني صقعت بوحده من العربياات حقت كارفور وانا طالعه والله ياهي عوتني الله

يقطعهم ما يعرفون يلبقوون عربيااات حتى

---------------

مره قالت أمي يالله تصلون جماعه وعزوز أصغر اخواني الإمام ووالله لو ماتصلون إن تنضربون كلكم

عاد عزوز أول مره حد يعطيه وجه ويقول تعال إمام وتعالوا شوفوا الصلاه يطوووووول ويوووم خلص إلا وكلنا مسوين اعتراض لا ياتصلي بسرعه يانسوي تبديل للإمام

وبعد مداولات كان اقتراحي انا أنه يبقى الإمام وإذا قلت احم يركع واحم يسجد يعني استغفر الله صلاة مابعدها

وحنا في الصلاه جت امي تراقبنا وانا حسيت بها فما قلت احم وطول الوقت وهو يقرا وامي مستانسه على بالها السديس على غفله

شوي الا وهو يقطع الصلاه يقول ماقلتي احم متى تبيني اركع

كلللللهم انضربوا الا انا حطيت رجلي وطوالي على بيت جدي وانا راعية الاقتراح

-------------------------

مره من المرات كنت رايحه المخازن الكبرى مع اختي وكنت ابي اشتري اذا تعرفونه المشقر اسمه ((كنت ))
ركزوا عالاسم السالفه فيه
المهم دورته دورته مالقيته الا القاقي ذاك المملوح الواقف ولابس بلوزه المخازن طبعا الاخ كان سعودي

رحت عنده ودار الحوار التالي :
انا :لو سمحت ابي كنت
الرجال:نعم (باستغراب)
انا :ابي كنت
الرجال يعد قميصه ويتبسم:يااختي مو فاهم عليك شتبين
انا معصبه :ابييييي..........
وتوني افهمها اثاري الاخ مع سرعه كلامي فهمها (ابيك انت )
انا القط وجهي وش القط مابقى به شي واقوله اوه اسفه لا اقصد مشقر كنت

بس بعد ايش بعد الفشيله

~~~~~~

07-08-2008, 05:28 AM

مره تهاوشت مع اخوي ورحت صحيت ابوي اشتكيه وفجعته !! ومن الفجعه قال لي : يابنت تعوذي من اخوك !

-----------------

انه كنا انا وخالتي جوعه << صحينا الصبح وفينا جوع الارض !! وطبعا الشغاله الله يكافيها مقفله المطبخ وداسه المفتاح

وقررنا نشتري فطور لكن كيف ومين يشتريه ماندري
جمعنا الفلوس الي فحصالتنا << مجتهدين نجمع هههههههههههههههه
اخذنا الريالات والانصاص والارباع وسوينا مسرحيه انا البطله ههههههههههههههههه

لبست عباه جدتي وسويت نفسي ام
وخالتي بنتي لبستها عباه قصيره << يلعن ام المخ العبقري

وصرت امشي وكاني عرجاء وبنتي معاي ورحنا البقاله وقلنا للعامل ياوليدي عطينا فش فاش وببسي << الحين العجوز وش تبي بالفشفاش!! (الفشفاش) شيبس حق الوارعين

والحمد لله انه بنقالي ولا كان انفضحنا

كل هالفضايح وبالاخير فطرنا شيبس وببسي

<<اتخيل شكلهم هههههههههههههههههههههه

-----------------

انا في طفولتي ما أذكر لمست الأرض .. دائماً فوق !! .. فوق جدار .. فوق دولاب .. فوق شجره .. فوق مروحه .. يعني تقدرين تقولين اني كنت طفل غير قابل للجاذبيه الأرضيه

مره كنت راجع من المدرسه بشهاده حافله بالدرجات الهابطه .. الغريب اني ساقط في 18 ماده مع أن عدد المواد كلها 16 ماده .. ايه والله شلون جت ؟؟ .. ذكروني أروح للمدرسه بكره أشوف وش السالفه <<< بدري

المهم .. وصلت للبيت و القى الوالد و الوالده الله يعطيهم الصحه والعافيه مستقبلنيي عند الباب بكل حفاوه و ترحيب .. اللي ماسك العقال و اللي ماسكه الشبشب ينتظرون اللحظه الحاسمه للإنقضاض علي

طبعاً مثلكم عارفين اني متمرس في تسلق المرتفعات عشان كذا ما حبيت أهين مهارتي التسلقيه بالركض أو الهروب .. لذلك رقيت أقرب جدار جنبي و عقال أبوي و شبشب الوالده ماشين مليووون وراي ..

طمرت للجدار الثاني عشان انحاش من قبضة الوالد اللي قام يدور على سلم عشان يمسكني ... و لكن هيهاااات و انا متسلق الإيفرست شطيط .. جلست أتفرج عليهم من فوق الجدار و اطلع لساني لهم عشان أقهرهم .. ما دريت الا و الوالده ترجم علي قواطي و نعال و بيالات و أباريق و ملاعق و طماط و أسطوانة غاز عشان أفقد توازني و أطيح لهم تحت .. و لكن برضو هيهاااات وأنا متسلق الإيفريست شطيط

طمرت لجدار الجيران بنحاش من رميات الوالده الثاقبه .. توني بكمل طريقي الا و دردوووووب .. طحت على وجهي في الشارع <<< طلعوا الجيران الكلاب هادين جدرانهم عشان يبنون ملحق

و طبعاً أنتهى بي المطاق بين يدين الوالد الخشنه و عقاله اللاذع و بين شباشب الوالده المرصعه بالحديد الخالص

--------------------------------

نسيت أقول لكم أني كنت أعشق لعبة ( العرسان ) في طفولتي .. بصراحه هاللعبه هي سبب عشقي للطفوله

كنت أوقف أنا و أخوي عند باب الشارع ننتظر خالتي تجينا .. أول ما يوصلون نسحب بناتهم من السياره و نرقى بهم لغرفة أبوي و أمي <<< ما عندهم وقت

طبعاً بداية اللعبه .. ان بنت خالتي تجلس قدام المرايه ( حقت أمي ) على بالها تتمكيج .. و أدخل انا عليها تعباااان يعني اني توني راجع من الدوام .. ثمن أعطيها نظرات فحوله طاغيه وأنا أقول: إلى هالحين جالسه .. يلا قومي بسرعه حطي لنا الغدا ورانا مشوار لبيت صديقي العصر .. قوووومي وووجع !! .. عاد المدام تطمر من كرسيها وهي تقول: حاضر حاضر ابن عمي

بعد ما نتغدا و نغسل ايدينا من زيوت الرز<<< على ايش تغسلون وانتم تتغدون بسكوت أبو ولد و فشفاش بفك يالنصاب

المهم بعد ما نخلص من الغدا .. نقوم نريح لنا شوي عالسرير .. القهر اننا ننسدح عالسرير و نلعب أونو بكل براءه و دلاخه .. كل ما أذكر هالموقف أحقد على نفسي من شدة الندم

بعد ما نريح أو بالأحرى بعد ما نخلص من لعب الأونو عالسرير .. نقوم نطلع من بيتنا ( غرفة الوالد ) و نطلع لبيت صديقي و زوجته ( المخزن ) .. لكن بصراحه قمة الغباء اني كنت أوقف قدام باب المخزن وأضغط على الجدار و أنا اقول: دن دن دن دن دن .. يعني اني اضغط عالجرس .. ثمن يفتح لي صديقي الباب و أدخل برجلي اليمين و أنا اقول: يااااااولد ..
--------------------------------

أذكر يوم كنت في المرحلة الأبتدائية طحت في موضة التسجيل بالمسجل .. مدري وش المسكة الغبية .. كنت اجيب شريط فاضي واحط المسجل جمبي وكل شوي اسجل شيء .. اما نكته ولا قصة ولا سالفة ولا اغنية وكلها بصوتي .. وجاني هوس بالتسجيل لدرجة ان ابوي صار يدخل البيت ويحاول يفتح الباب وما يقدر لانه يصير ناشب .. بعدين يحاول يدفه بقوة وما يدري الا والباب منفتح ويصقع في راسي .. لاني كنت جالس وراه وأحاول اسجل صوت الباب وهو ينصك <<--- متأثر بصوت الباب اللي يجي في الأفلام المرعبة ويحاول يسجلة

ما أخفيكم اني زاف الهواية ذي من شطيط .. واللي كان بدروه مثل الأب الروحي لي وانا كنت له مثل الأم الروحية .. لدرجة انه كان إذا شرى قلم أروح اشتري انا قلم .. ولو أروح اشتري أنا بدلة يروح يشتري هو بعد مثلي .. المهم كنا نسجل أنا وياه اي شيء نلقاه .. وأذكر مره من المرات كنا نلاحق النمل اللي يمشي على الأرض عشان نسجل صوته وهو يمشي <<---- قاتلنا الفراغ

النكته وين ؟! .. كنا نسجل مسرحيات .. انا ابي افهم وش لون تسمى مسرحية إذا صارت صوت بس

!!!!!!!!!!!!!!!!!

-------------------------

أتذكر يوم كنت طفل <<< وش فيكم تناظرون حتى أنا كنت طفل

أتذكر كنت ألعب مع بنات الجيران في الرمل ، لأن أصلاً ما كان فيه أسفلت في ديرتنا ذيك الأيام

وحدة من البنات لقت نص ريال في الرمل و فرحت فيه مرره .. النصف ريال ذيك الأيام يجيب حاجات حلوه

حسيت الثانية ضاق صدرها ... شكلها غيورة و تبي فلوس بعد

عاد أنا ما رضيت أشوفها ضايق صدرها قلت لازم أعطيها فلوس من عندي <<< كريم من يومه

بس في نفس الوقت ما ابي احرجها <<< اتيكيت من يومه بزر

رحت لبيتنا و جبت ريال (نص و نص) و رميتهم في الرمل بدون ما يشوفوني

و خطتي كانت إني ألقى الفلوس و أعطيها البنت اللي ما لقت شي عشان أفرحها

و بديت أدور و لقيت أول نصف بسرعة و عطيته البنت و استانست

اللي قهرني إني إلى اليوم مالقيت النصف الثاني ... ظنكم خذته البنت الثانية و أنا ما دريت

------------------------

-فيه لعبه كنا نلعبها من عيال خالاتي وهي نقدر نسميها لعبه نص كوم

بشرح لكم طريقتها

اول شي كل ولد يختار له بنت ( طبعا انا في هالمرحله مرحله الطفوله العربجيه فكنت اصف معهم اختار لي بنت )

المهم هذي البنت نسميها صديقته ( خويته يعني ) .. تبدا اللعبه ان البنات يركضون في جهه ثمن بعد فتره ينطلقون العيال كل واحد منهم يحاول يمسك صديقة الثاني .. اذا مسكها خلاص هي توقف لين يجي صديقها ينقذها

بس شرط اللعبه انه اذا جا ينقذها لازم يخمها ماينفع كذا يمسكها وقضينا لالالا ابدا < اككتشفت ان هالشرط من مخ عيال خالتي لاني يوم جت اللعبها مع مع الجيران طارت عيونهم فيني

لا يضمها عشان تقدر تحركها .. عاد تعالوا شوفوا الفيلم الرومنسي اللي يصير

المشكله انا الثوره الهدره وراني ماوسعت صدري وصرت بنت حالي حالهم مستانسه انا وجهي اخمخم بنات

------------------

(( قصة طفولتي ))

بدت معاناتي في الحياة من أول صرخة أطلقتها يوم طلعت من بطن أمي .. طلعني الدكتور وشالني على يده ومازالت على جسمي المادة اللزجة وهو شايلني زلقت من يده وصفق راسي في حافة السرير الحديد من قوة الصفقة انعفط راسي طلع كنه صلصال على طاولة بزر .وياليته انعفط وبس صار مخي بالعرض كنه مكينة كورولا . جلست اصيح والدكتور يناظر فيني وعلامات التعجب على وجهه .. وهو يقول للسستر نادي لي الطاقم الطبي كله عندنا ظاهرة غريبة .. قولي لهم مولود .. نبي نحدد نوعه .

بعد ربع ساعة تجمعوا الطاقم كلهم ولفوا حولي وجلسوا يناظرون فيني كنهم يطلون في بير .. قال الدكتور الأول وش تتوقعون اللي طلع من رحم الحرمة هذا .. قال الثاني وهو يناظر فيني ومستغرب أتوقع انه دوده شريطية كاملة النمو .. قاطعة الدكتور الثالث .. قال لا ما أتوقع أنه دودة .. أتوقع أنه نوع من أنواع سمك نهر الأمازون بس هذا مطور له رجلين ... قال الدكتور الرابع .. أقول فكونا منه حنا صورناه بكاميره فيديو ونقدر نرجع للشريط ونتفاهم على نوعة ..

بس أبوه جالس ينتظر برى على أحر من الجمر ... قال كلامة وهو يلفني في كنبل كان عليه رسمة قطاوة مستقرفه مني ..لفني وعاطاني للسستر وقل وديه لبوه .. شالتني ورحنا لبوي ولقيناه ينتظر برى غرفة العمليات رايح جاي كنه ينتظر باص في السيب من كثر ما يروح ويجي طلع في البلاط خطوط زبيرياته .. وهو يروح ويجي جته السستر وقالت خذ مبروك .. ناظرها ابوي بفرح وقالها ولد وإلا بنت .. قالت السستر والله مافي معلوم ولد ، بنت ، حتى دكتور في جالس فكر إيش هذا ... اخذني وعطاها مية ريال وهو يقول روحي جعله في خشمك هالأفنس كنه وطاية مطبخ .. قال كلامه وجلس يناظر فيني وهو يقول وراهم مغطين وجهك يا بعدهم كلهم ..

وأنا ادعي ربي انه ما يرفع الغطى عن وجهي .. لكن تجري الرياح بما لا تشتهي السفن .. رفع الكنبل .. وأول ما شافني تقلب وجهه طلع كنه حمام قطيفي .. يوم شفت وجهه تغير وكنه استقرف قمت اتدلع واحرك راسي ابيه يحبني وينسى شكلي لكن عطاني تفلة في وجهي من قوتها وكثرها بغيت اغرق .. وقالي نعنبو هالوجه اللي كنه طاسة شفر مصدوم يا حسوفة المية ريال اللي اخذتها الممرضه قال كلامه وقرب وجهه عند وجهي وقالي وش ذى الاشباه مهيب علي ولا على أمك أشباهك كنها اشباه قرود الطايف .. أقول يا حلالات بشي اسمه وادي العيال هالحين كان دفنتك .. وإلا أرميك في منجم تحت الأرض وارمي وراك أصبع ديناميت عشان أخفي أثرك مرة وحدة ... جلست أحرك أصابع رجلي وهو يناظر فيها .. ويقول وش هالأصابع كنها نقانق مطبوخة بزيت فرامل .. المهم ابربيك واخذ فيك اجر .. صراحه ضاق صدري حسيت اني حيوان من كلامه ... وجالس يطبق علي نظام الرأفة بالحيوان .

عشت حياتي في البيت حالي حال أي أبجورة محروقة محد يستفيد منها ... كنت كل ما جا أبوي من العمل اروح عنده بكل برائه الأطفال وأول ما ادخل عليه تجي في وجهي زبيرية مع كم كلمة شينه منها اطلع يا حمار .. اطلع يا الفرزدق يا ذميم الوجه .. فارق يا القبيح .. حتى الغدا فيه تفرقه .. الكلب اللي مربينه عندنا ياكل معهم وأنا آكل أكلي في المطبخ وأنام في بيت الكلب وإذا جيت اركب الونيت يركبني في الصندوق .. ويحاول انه يسرع وياكل مطبات عشان أطيح .. لكن أنا تمسك زين واقهرة .. صح أنه فيه مرة كنت سرحان وكان طاير بالسيارة ومن قوة السرعة أكل مطب وكان قدامنا كبري بندخل تحته .. من قوة المطب طرت من السيارة وصفق وجهي في عرض الكوبري بالتحديد صفق في اللوحه اللي مكتوب فيها أقصى ارتفاع خمسة متر .

تحملت ضغوط الحياة حتى اخوياي اللي يشوفوني ينادوني يا احدب نوتر دام .. وأنا أقول في نفسي الحمد الله أني خليجي وفي زينا شي أسمه شماغ.. امشي واطق لطمة عشان محد يشوف وجهي .. ناقصني حصان واصير فارس بني عبس على هاللطمة .

عشت على جانب الحياة .. حتى جانب الحياة شاتني ضفر وعشت برى جانب الحياة ..

جا يوم وقالي ابوي بنروح للملاهي ، وقالي شف ابيك تركب اخطر لعبة عندهم ابشوفك بتصيح وإلا لا ..ناظرت فيه وقلت في نفسي تلعب على مين يبو قل أبغاك تموت وريحني ... وحنا في الطريق قالي غيرت رايي وش رايك نروح لحديقة الحيوان .. قلبتها في راسي كني أقلب دجاجة على جمر ثمن قلت قدام .. رحنا للحديقة أول ما دخلنا شفت قفص القرود ..وجلست أتفرج عليهم وجاني قرد وقرب عندي وناظر فيني وهو يقول .. يلعن أبو الواسطة للي عندك يا شيخ انت برى وحنا جوى القفص محبوسين ... المهم طنشته ولا كأني سمعته .. يوم جينا بنمشي انا وأبوي ما خلونا السكيورتيه نطلع .. جا مدير حديقة الحيوان لبوي وقاله شف أنا أبكتب لك شيك باللي تبي بس تبيعنا القرد اللي معك وبالمبلغ اللي تبي .. لأن القرد اللي معك نادر وجوده .. ناظرني أبوي وحسيت أنه أبتسم أبتسامه خبيثة .. جيت عنده وقلت للمدير أنا ولده ... قال أبوي .. تبونه خذوه .. ما أمداه يكمل كلامه إلا على طول طبوا علي وحطوني في القفص ... وكان فيه من ظمن السكيرتية واحد اذانية فارشهة كنها مهفات عجز في بيوت الطين

أخذوني غصب وعشت سبع سنوات في حديقة الحيوان جلسوني مع قرده في قفص .. صح انه جانا عيال بعد فترة بس مهوب مني العيال .. كانت القردة تطلع آخر الليل للقفص اللي جمبي .. وتسهر مع القرود وأنا اجلس اكتب مذكراتي وإذا جا آخر الليل تجي وتقولي يا الله رح ارتاح يا حبيبي يا( ابو هديب ) أنت أجهدت نفسك اليوم وبعدين ليش ما تعشيت ... أنا حاطة لك موز قاطفتة بيدي ...أناظر فيها ومن الغلقة أنام بدري .. وإذا جا العصر بدو البزران يجوون وقت الزيارة ومعهم مكسرات ويرجمون من هالحب الرخيص .. حتى فيه بزر أنا حاقد عليه رمى علي قطعة فستق وهو يقول فكها بسنونك وجبها لي .

المهم مرت الأيام وقدمت طلب لإدارة حديقة الحيوان إني أكمل دراستي ... ووافقت عليه وكملت دراستي والقرده تسهر على راحتي .. تقشم لي الحب وتحطه لي في صحن مع مويه من المستنقع اللي جمبنا .. وتفلي راسي وتطلع القمل وهي تقولي شد حيلك وأرفع روس القرود يا ( أبو هديب ) .. أثبت للعالم أن عقولنا وحدة طالعت فيها وأنا أقول لها كم مفصل في إصبع رجلك ... جلست تحك راسها وهي تقول حبيبي لا تخليني أفكر أخاف تتفجر عروق مخي ... البركه فيك ..وبعدين أنا صرفت عيالي وأرسلتهم للقفص الثاني ... قامت تطق على كتفي من ورى .. وهي تغمز .. قلت لها هيه .. انا مانيب حق هالحركات .. قالت وهي مستغربة وش فيك .. عصبت .. حبيت أمزح معك ... قلت لها الله يخليك أبي أذاكر لأن وجهك بصراحه قاطع لا سلكي يمنع الإلهام يجي .. اطلعي روحي مع عيالك أنت وخشمك هالفارش ..

درست في الجامعة بس شرطت إدارة الحديقة أني البس قناع كل ما جيت أروح للمحاضرات .. عشان ما تنحرج الإدارة مع الشرطة ويعاتبونها ليش طالقين حيواناتكم برى الحديقة ... مضيت خمس سنوات وصرت مُحاضر في الجامعة ... بس محاضر بقناع .. وكانوا العيال يتريقون علي .. وينادوني سكريم ، يا وجه المطاط .

تخرجت .. وتحديت العالم كله .. وتغلبت على قبحي .. لأن الإنسان إن فقد شي يعوضه بشي ثاني .. مثل الأعمى لما يفقد البصر يعوضه بالسمع ، والمشلول لما يفقد المشي يعوضه بالذكاء .. والاصم يعوض الصمم بمهارة قراءة الشفايف .. بأختصار الحياة تحدي وإيجاد البديل اللي يعوض النقص .

وبس

عنيدهـ

07-08-2008, 07:54 AM

ههههههههههههههههه
.
.
.

صج اياااااااااااام الطفوله حلوه مستحيل انساهاا ..^^

ودي ترجع ايااااااااااام الطفوله مرة ثانيه
.
.
.

يعطيكـ العافيه << عنيده حد الدعسه >> ..
.
.
.
على موضوعكـ
.
.
.

ولاتحرمينا من مواضيعكـ المشوقه
.
.
.

07-08-2008, 11:31 PM

ههههههههههههههههه
ابيك انت / ابي كنت
هههههههههههههههههههه

يسلم قلبك عنيده

11-08-2008, 03:18 AM

, , ,

,,

صرآآحه آي ــآآآمهم حقين الطفووله روووعه حيييل ...

//
//

بس آخر وآحد كسر خآطري مسكين ..

لكن حمدلله والشكر مع اللي يصيره ويطنز ويضحك على عمرهـ ..

>>> متأأثرهـ ..

تسلم ديآتس عنوووده ,,

ثوووكراً على الفرفشه الرهيييبه..

..

11-08-2008, 06:05 AM

ههههههههههههههههههههههههههههههههههههههه هههههههههههههههههههههههااي

ويا حلاتها من ايم والله حلوووووووووة با المرررررررررررررة ولها ذكريات ماتنسي..

ثنكيوووووووووو لك ع الذكريات الفلته..

Diamond<<<<

12-08-2008, 05:58 AM

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

اقتباس:

المشاركة الأصلية كتبت بواسطة sweet girl

صج اياااااااااااام الطفوله حلوه مستحيل انساهاا ..^^

ودي ترجع ايااااااااااام الطفوله مرة ثانيه

حييييييييل تهببببببل

ابي بس يووم... والله بس يوم واحد

العب وانطط واتهاوش واصيح واتعب وأطلع الشارع وأركب السيكل واتميرض هههههه

أحداث ومواقف طريفه أيام الطفولة والشباب

استراحة المجتمع