الجزء الثاني عشر
مصعب دخل على ابوه بالمكتب ،،
مصعب :يبا ممكن ادخل ؟؟
ابو مصعب : تفضل .. خير ؟؟
مصعب : يبا انا اسف يبا صدقني هدى طلبت الطلاق وانا مالي شغل .. يبا صدقني انا ..
ابو مصعب :مصعب مابي اسمع كلامك ،، ويليت تطلع بره الحين
مصعب : يبا الموضوع صار له اكثر من 5 شهور ،، مو معقوله جذي
ابو مصعب : انت مو ولدي ولا تقول يبا .
مصعب : بس انت ابوي ومالي غنا عنك ..
ابو مصعب تأثر من كلمه مصعب ، مصعب ولده الوحيد .. شلون كان طماع جذي وفكر بنفسه اكثر من تفكيره بولده .. : مصعب .. لو سمحت اطلع ونتكلم بعدين .
مصعب باس راس ابوه وقاله انا اسف وطلع ..
بــعد يومين ،،
جود : يما لا تبجين خلاص الله يخليج ،، بروحي ولهانه على شوفج .. متى تطلعين من العده واتين لي المستشفى اضمج يا يما ، ولهت على حضنج .
ام فهد ببجي : يبنيتي والله انا اللي ولهانه عليج .. والله يقومج بالسلامه ..
جود : ان شاء الله ،، انزين يمه انا الحين استأذن ما بقا شي عالعمليه وكاهو فهد وصل ، بقعد شوي وياه .
ام فهد : بحفظ الله .
جود كانت منسدحه عالسرير يوم شافت فهد .. لاحظت ان معاه عبدالمحسن ومصعب .. يوم شافتهم سحبت الشيله اللي يم راسها ولفتها على شعرها بطريقه عشوائيه ، بالكاد تغطي شعرها ..
فهد : السلام عليكم ..
جود : وعليكم السلام يا هلا ..
فهد : محسن ومصعب اذوني يبون يتطمنون عليج .. وكاهم يو معاي عشان يشوفونج .
جود عدلت الشيله عشان تغطي شعرها الاسود اللي كان محاوط ويهها الملائكي : هلا والله . شلونكم ؟
محسن ومصعب : الحمدلله ،، نسأل عنج .
محسن : جود لا تخافين ان شاء الله العمليه بسيطه ومافيها شي ..
جود : ان شاء الله
اما مصعب فكان يكلم جود بلغه ما يفهمها الا اثنين يحبون بعض ،،، كانت عيونهم تتكلم .. كانو يتخاطبون بالنظرات .. والقلوب .. كل واحد يقول للثاني تكفا قاوم هالظروف عشاني .. لان حياتي بدونك ما تسوى
والله ما يسوى اعيش الدنيا دونك
لا ولاتسوى حياتي بهالوجود
قاطع هالمشهد صوت طرق خفيف عالباب ..
امينه : السلام عليكم ..
جود ومحسن ومصعب : وعليكم السلام ..
محسن ومصعب وفهد : احنا نستأذن
طلعو الشباب ،، محسن حط عينه بعين امينه ،، شنو هالملامح !! صج البنت حلوة ..
بس تشبه احد اعرفه .. تشبه .. تشبـــه إييييييه تشبه (( قابريلا )) اللي كانت معاي بالجامعه ..
بس شياب لي ياب .. يازيييين هالكويتيه ،، حلوة ومحترمه ..
امينه كانت لابسه بنطلون لو وست وبدي ابيض عليه كتابه حمره ونظاره شمسيه ورافعه شعرها بشريطه حمره .
امينه : هلا بالجود هلا بالجمال النائم
جود : هههه شدعوه امونه ..
امينه : يالبطله اليوم عمليتج فديتج .. ان شاء الله تقومين بالسلامه..
جود: ان شاء الله ..
قاطعهم دخول شهد اللي وصلت مع السايق ..
شهد : قوة بنات ..
جود وامينه : يقويج .
شهد : هلا بجودو المليقه ، ولهت عليج وقلت ايي اشوفج
جود: زيييييين تذكرتي
شهد : شفتي انا طيبه وما انسى ،، شهد وجهت الكلام حق امينه :: امون اخوج داز لي مسج يقول عظم الله اجرج يحليله ، ما قصر بس من وين له رقمي ؟؟
امينه بصدمه : جليل الحيا .. والله مادري عنه اكيد ماخذه من موبايلي انا اوريه هالغبي
شهد : لا لا يبا من صجج عادي بس استغربت يعني من وين له رقمي .
امينه : لا خلاص ما عليج شهود .. انا جم مره اقوله بنات الناس مو لعبه بس ما يفهم
جود : انزين بطلو هالحجي وسولفو وياي وراي عمليه وانتو فاضين
موعد العمليه ..
مصعب كان واقف يم فهد ..
كان مصعب بقمه الارهاق ،، كان لابس بنطلون جينز ديرتي وقميص اسود مبين تقاسيم عضلات صدره ، شعره ما كان بذاك الترتيب فيه لمعه بسيطه تبين اثر الجل واللحيه صايره ديرتي ،،
كان متسند عالطوفه ويدعي حق جود ..
مصعب : فهد يعني ان شاء الله تكون زينه ؟
فهد : انت شفيك مصعبو جنك ياهل أي ان شاء الله تكون بخير.
مصعب تضايق وسكت ..
التفت عليه فهد : مصعب لا تحاتي جود قويه ان شاء الله ما فيها الا الخير .
محسن كان بعالم ثاني .. كان يطالع امينه اللي كانت واقفه مع شهد من بعيد .
كان يفكر فيها ،، الحمدلله والشكر انا شفيني سرحت جذي بالبنت !! هذا وانا اول مره اشوفها ..
ام فهد كانت كل ساعه تتصل على فهد تسأله عن جود .. وفهد كان يطمنها ،،
مرت ساعات العمليه ،، وطلعت جود من غرفه العمليات ..
فهد على طول راح للدكاتره ..
فهد : دكتور ها بشر ؟؟ نجحت العمليه ؟؟
الدكتور : الحمدلله نجحت .. كان في مشكله بسيطه مع رفض الاعضاء بس الحمدلله تخطيناها .. اختك ما شاء الله عليها قويه
فهد : الحمدلله لك يارب
مصعب ما تحميل الفرحه ونزل عالارض وسجد سجده شكر يحمد ربه .، اما امينه وشهد فكانت دموع الفرح اهيا اللي معبره عن موقفهم ، وعبدالمحسن مثل عادته اكتفى بابتسامه رضى تناسب شكله الجدي الجذاب ،،
فهد اتصل على امه : الووو يماااا ابشرج ..
ام فهد بخوف : ها بشر بشر؟؟
فهد : نجحت العمليه وطلعت جود الحمدلله
ام فهد ما تحملت الخبر وقعدت تبجي : الحمدلله لك يارب ..
وراحت تصلي ركعتين شكر .
دخلو البنات عند جود بعد ما سمح لهم الدكتور .. جود كانت لي الحين تحت تأثير البنج .. ما حست باللي حوالينها ..
فهد دخل على اخته وباسها على جبينها وطلع .. وخلوها ترتاح ،،
بعــد اسبوعين ..
فبيت ام نور ،،
نور : مامي آآي فيل سو باد .
ام نور : دونت وري ، آآي ول كوول يور هسبند
قطع كلامهم صوت باب البيت انفتح ..
فهد : نوووري .. نوري وينج ؟
ام نور : وي ار ان ذا صاله
فهد : أي أي عاشت خالتي ،، ان ذا صاله هههههههه
فهد باس راس خالته وراح ضم مرته على صدره .. : نونو تدرين ان جود وايد تحسنت
نور بفرح : صج ؟؟ وناسه الحمدلله
فهد حس ان نور مو طبيعيه حس انها تعبانه ،، مسح ايده على خدها : نور حياتي شفيج ؟
نور : مافيني شي حبي
فهد : تخشين علي ؟؟
نور : مافي شي بس شوي تعبانه .
قامت نور بتروح دارها ،، ولا تطيح عالغنفه ..
فهد قلبه انشلع مع طيحتها : نوووووووووووووووووور
نور ما كانت تتحرك ..
فهد شال نور على ايده وام نور راحت بسرعه لبست ملابسها وراحو المستشفى ..
الدكتور : مرتك بتولد ..
واعلن بالمستشفى حاله الطوارئ ..
فهد كان ميت خوف على مرته حبيبته وولده ..
يارب تقوم بالسلامه .. الله يحفظها يارب يارب الله يحفظها ان شاء الله ،،
من ناحيه ثانيه بالمستشفى ..
بغرفه جود بالتحديد كانت امينه عند جود ،،
امينه : واي بعد عمري .. ما بغينا نشوف هالبسمه
جود : ويهج كل الخير وليش ما ابتسم له ،،
امينه انحرجت من اطراء رفيجتها : تسلمين جودي
جود : تدرين امون لو الف الكون كله وارد لج ما اقدر ارد لج الجميل اللي سويتيه لي .. انتي انقذتيني من اصعب شي بهالكون ..
امينه : افا عليج .. انا عند ويهج .
جود : امونو بس تكفين خلاص لا تنفخين ريشج علينا مو وقته تشوفين نفسج بعد هههه
قاطه صوتهم صوت طرق على الباب ..
مصعب : ممكن ادخل ؟؟
امينه : لحظه مصعب .. جودي لبسي شيلتج بسرعه بيدخل ريلج ههههه
جود انحرجت وويها صار احمر : امينو يوزي عن سوالفج تكفين .
امينه : انزين يالله تره بقوله ادخل ..
جود سكتت .. ولبست الشيله
امينه : تفضل مصعب ..
مصعب دخل .. كان شكله مرتب ..
من فتره ماكان مهتم بشكله نظرا للظروف اللي يمر فيها ..
كان لابس بنطلون جينز فيه مخابي ،، وبلوزه كحليه عليها كتابه بيضا وجوتي رياضه ابيض ، ورافع شعره بطريقه ذربه سبايكي .
امينه : أستأذن انا الحين
جود ومصعب : لا خلج لا تطلعين شدعوه انتي منا وفينا
امينه : ميخالف انا استأذن شوي وبرجع .
طلعت امينه وظل مصعب مع جود
مصعب : شهالزين يالزينه ،، شحلاتج والله احلى من القمر ..
جود استحت : تسلم قلبي وانت بعد حلو واتينن ،، شعندك لابس بنطلون ؟
مصعب : هههههه ادري شي غريب مو يايلج مغتر .. بس بغيت اغير خفت تقولين لي شايب او شي من هالقبيل
جود : شدعوه يعني الحين أصغر .. الشايب شايب لو سوا المستحيل هههههه
مصعب : شايب هاااا .. اوريج ،، وطلع بره
جود قعدت تناديه بس مارد عليها
شوي ولا يدخل ومعاه بوكيه ورد كان حاطه عند باب الغرفه ..
مصعب : سبرااااااااايس ..
جود : ......
مصعب انصدم : ما عجبتج ..
جود نزلت راسها ودمعت عينها : ولهت عليك مصعب ..
مصعب راح قعد يمها : جودي مابي هالدموع حياتي لا تبجين ،،
ابتسمت جود ابتسامه رضا وراحه الحمدلله لك يارب رجع حبيبي يمي ..
من ناحيه ثانيه بالمستشفى ..
شهد : كلولولولووووووووووووووووووووووووووووووووش ،، مبروووووووووك فهيييييييد مبروك بو محمد واخيرا صرت عمه اخيرا اخيرا اخيرا ..
ام نور : الحمدلله .. ذاتس قريييت ..
فهد : مبروك خالتي ولو ادري انج مو فاهمه ،، كونقراتيوليشن
ام نور : ثانكس ..
راحت شهد تركض لغرفه اختها تبشرها ..
شهد : جوودي حمودي يا .
جود باستغراب : ومنو حمودي ؟
شهد : ولد نور وفهد ..
جود : صجججججج ؟؟ واااااااااااااااي وناسه .. وين فهود ابي اشوفه ..
شهد : مسكين الارض مو شايلته من الوناسه .. لحظه انا اروح له اشوفه يمكن ايي
شهد طلعت من غرفه اختها ولا تشوف امينه مع واحد ،، ما عطت الموضوع اهتمام ومشت
ولا يلحقها واحد ..
مشعل : شهد شههد ..
شهد : نعم ؟
مشعل : انا مشعل اخو امينه ،، اسف عالمسج اللي دزيته ، تره انا خذيت رقمج من موبايل امينه وياي اعتذر لج .
شهد : لا ما عليه ،، مسموح اخوي .. استأذن الحين .. مع السلامه
شهد راحت بخطوات سريعه ومشعل واقف يحترق ،، يازين البنيه..
بعد 5 شهور ..
ام فهد : حلات هالحمودي .. يازينه
نور: خالتي شوي شوي عليه اخاف يتعور
ام فهد : عشتووو تخافين عليه من خالتج !!
نور انحرجت : لا ما اخاف عليه منج شدعوه ،، بس هم اخاف عليه ههههه
ام فهد : هههههه الظاهر فهد لاحس عقلج ولاعب فيه لعب ،، صايره مثله فديتج
فهد : جني سمعت اسمي .. ولا اذوني خربانه ؟؟
نور : لا اسم الله عليك اذونك صاحيه
ام فهد : فهود جهز نفسك اليوم رغود ومبارك بيون و بنروح لهم المطار
فهد : ان شاء الله بس متى طيارتهم توصل
ام فهد : الساعه 8.30 بالليل.
بغرفه شهد ..
وصل لشهد مسج ..
((( بعد يومين اهلي بييون يخطبونج ))
شهد انحرجت ،، لان كان المسج من مشعل اللي اعترف لها بحبه .. بس اهيا ما عطته مجال يكلمها .
سكتت وقالت بخاطرها ،، احبـــك ..
الساعه 8.30 بالمطار ..
رغد ومبارك كانو توهم واصلين ..
جود : رغوووووووووووووووده يالبطه ولهت عليييييييييييييج .. فديتج رغوده
رغد : والله انا اكثر حياتي .. شزينج صايره تهبلين ..
ام فهد راحت تلم بنتها اللي ما شافتها من فتره طويله ، حتى بعزا ابوها ما يت الا يومين وراحت ..
الكل بالمطار كان فرحان برجعه رغد .. اخيرا رغد راح تظل عايشه بالكويت ومبارك تخرج ورد بشهاده ترفع الراس. .
بعد شهر،، بالصالون ..
جود : شزينج شهوده تهبلين والله احلى عروسه بالعالم ..
ام فهد : وييييه جود قولي ما شاء الله ،، والله قلت لها سوي عرس ماتبي بس تبي ملجه ..
شهد : يما مالي خلق عوار الراس واعراس وخربطه خليني جذي ملجه وكافي .. وبعدين مشعل بعد ما يبي مستعيل مادري شعنده ههههه
جود : يالله زين بسج قرقه خل تحط لج مكياج ..
الساعه 9 بقاعه العرس ..
كان الكل ينطر بنت الهارفي ،، كان العرس مترف والحظور اغلبيته من الطبقه المخمليه ..
كانت جود ماليه عين الكل بجمالها .. كانت ماخذه الانظار ،، وامينه كانت اتيي بعدها بالجمال .. بس ملامح جود كانت عربيه اصيله ،، كانت لابسه نفنوف احمر طويل وفيه كرستالات صغار فضيه .. كان شكلها جنان .. وشعرها الاسود زايد من حلاها ومعطيها جمال يفوق الوصف ..
الساعه 9.30 دخلت شهد .. على صوت راشد الماجد باغنيه شعاع النور ..
دخلتها كانت اكثر من روعه .. الكل دمعت عينه متأثر ..
كانت دخلتها شي يفوق التعبير وجمالها كان محط انظار الكل ..
لين وصلت الكوشه ،، رغد وجود كانو شايلين العرس بما انهم خوات العروسه .. اما امينه فكانت شوي مستحيه .. بس هم كان لها دور كبير ،،
بعدها دخل المعرس .. والكل تكلم عن ملاحته .. كان مملوح وشكله ذرب ..
جود كانت مستانسه ان اختها خذت مشعل ،، وامينه صارت من اهلهم ..
خلص العرس وخلصت معاه اصوات الاغاني والموسيقى الصاخبه ..
بعدها ،، زادو الخطاب لجود بس جود كانت ترفض الكل .. كانت تنتظر واحد ،، تنتظر مصعب حبيبها .. اللي وعدها يتزوجها .. لكن اخباره انقطعت من فتره ،، وينه فيه ؟؟
فبيت مصعب ..
مصعب : يبا الله يخليك ابي البنت انا ماقدر اقعد جذي شوف جم عمري صار .. انا الحين 23 سنه ربعي تزوجو وانا لي الحين قاعد ..
ابو مصعب : خلني افكر
مصعب : يبا تكفا .. مابي تروح البنت من ايدي ..
ابو مصعب : خلاص خلني افكر
جود كانت بغرفتها تفكر بمصعب ..
دزت حق مصعب مسج (( حبي وينك ؟؟ ))
مصعب (( موجود قلبي .. بس شوي امر بظروف ))
بالصاله فبيت ام فهد ..
رغد :فديته حمودي ،، تره يشابهج نور
نور: احس انه يشبه فهد ..
رغد : لا يشابهج اكثر .. ويشابه فهد بعد
ام فهد : فديته حفيدي
رغد : أي يمه أي صرتي يده ..
ام فهد : كبرنا يابنيتي
رغد ونور : الله يخليج لنا ..
شهد : يما انا ومشعل ان شاء الله بنسافر الاسبوع الياي .. انا قلت له اجل السفر ،، مابي اسافر قبل لا اشوف وين قبلوني أي كليه ..
جود : ها شتقولون شتسولفون ايييه اكيد ماخذينها راحه تسولفون وانا فوق
ام فهد : بسم الله الرحمن الرحيم يبا شهوده تسولف عن القبول ..
جود : أي صج ،، وين قدمتي انتي ؟
شهد : انا ودي حقوق بس ان شاء الله يقبلوني ..
جود : ان شاء الله .
فبيت عبدالمحسن ..
محسن : يبا بتزوج ..
ابو محسن : هذي الساعه المباركه بس بنت منو ؟
محسن : اخت ريل شهد بنت عمي محمد الله يرحمه
ابو محسن : دامك تبيها وتقول انها خوش بنت خلاص ان شاء الله نشوفها لك . ونخطبها
محسن : والله صج يبا ؟؟
ابو محسن : وليش لأ ،، وفي ابو ما يبي يشوف ولده معرس ؟؟
محسن باس راس ابوه : تسلم لي يبا الله يخليك لنا ذخر
الساعه 10 بالليل ..
ابو مصعب : ام مصعب نادي مصعب
ام مصعب راحت تنادي مصعب اللي راح بسرعه حق ابوه ..
مصعب : هلا يبا طلبتني ؟
ابو مصعب : اقعد ياولدي ..
مصعب مستغرب : خير يبا ؟؟
ابو مصعب : انا بكلمك بحقيقه زواجك انت وهدى .. وابيك تعرف اني ما ظلمتك فيه .. بس ابيك تسمعني عدل وتفهم بعدين قول اللي تبي تقوله ..
شنو حقيقه زواج مصعب وهدى ؟؟
شاللي خلا ابو مصعب يتكلم بعد كل هالسكوت ؟؟
وهل راح يوافق على زوج مصعب وجود ؟
تم الجزء الثاني عشر
للتسجيل اضغط هـنـا
02-08-2008, 06:54 PM 
رد: مملكة جود ...(قصة كويتيه) 
المسآبقة مآتحلى بدون مشآركتك 