مملكة جود ...(قصة كويتيه)

02-08-2008, 03:50 AM

الجزء الخامس

الكل رد البيت ،، شهد كانت لين الحين منشغله بسالفه الرقم اللي عطتها اياه رفيجتها وقررت انها تتصل ..
طقت الرقم وكانت متردده تطق اتصال ولا لأ ..

اتصلت شهد ولا يطلع لها واحد .. اخترعت وحست انها غبيه لانها اتصلت..
شهد: الو .. أأأأأ .. هذا مو رقم سعاد ؟
الطرف الثاني : لا غلطانه . بس اصير لج سعاد
شهد على طول صكت التلفون وقعدت تلوم نفسها على اللي صار وقررت انها تقطع علاقتها بإسراء ..

فبيت مصعب ::
ام مصعب : أي والله اهوا قال لي جذي وانه متعلق بالبنيه وشكلها خوش بنت
ابو مصعب : بس انا ابيه حق بنت عمه
ام مصعب : بس هذا رجال مايصير نغصبه على شي ما يبيه
ابو مصعب : بس كلمه ابوه تمشي المفروض
ام مصعب : بس هم حرام تكسر الولد
ابو مصعب : صكي الموضوع لو سمحتي وخلاص
طلع بو مصعب من غرفته وراح غرفه مصعب اللي كان منسدح على السرير وغترته يمه والموبايل بيده يقرا رسايل جود ويتخيلها معاه ،،
دخل ابو مصعب وبطل الباب بطريقه عنيفه ..
ابو مصعب : مصعبووووو ..
مصعب : امر يبا
ابو مصعب : منو هالبنت اللي امك كلمتني عنها
مصعب : يبا وحده ويانا بالجامعه وشفتها وسألت عنها وابيها
ابو مصعب : مافي زواج الا من هدى بنت عمك حط هالموضوع فبالك زين .. هدى مرتك وبس
مصعب : يبا مستحيل هدى اكبر مني
ابو مصعب : اكبر منك او اصغر منك انا ما يهمني ،، تاخذها يعني تاخذها
مصعب : يبا حرام عليك جذي ،، انا الجازي مابيها مستحيل افكر فيها كزوجه انا اعتبرها اخت كبيره شلون تبيني احبها كزوجه
ابو مصعب : انا قلت كلامي وانتهى ..
طلع وصك الباب وراه ،، مصعب حس ان الدنيا كلها مو شايلته ما يدري شنو يسوي هذا ابوه .. وجود حياته ونبض قلبه ؟ شلون يتخلى عن حبه بهالسهوله ؟ والبنت خلاص حبته ما يقدر يظلمها معاه

مصعب دش بدوامه ضيق فتره طويله ما درى شنو يسوي .. يقول حق جود ؟ او يسكت ويحاول يحل المشكله ..
أتزوجها من ورا اهلى ؟ لا لا مستحيل ،،، عيل شنو الحل ؟ مستحيل ارضى بغيرها ..
وقعد طول الليل يفكر بالموضوع ..

فبيـت ابو عبدالمحسن ..
تحديدا بغرفه عبدالمحسن ،، كان عبدالمحسن يرتب اغراضه ويرد هدومه الكبت .. كان حاس بالضيق شوي ،، تعود على الحياة بامريكا وربعه اللي هناك ، صج انه ماله علاقه بالشقرات بس اشتاق حق ((قابريلا)) كانت بنت من نوع ثاني ،، بالنسبه له كانت جذابه وايد وحلوة ومغروره .. وكانت تحترم دينه وعاداته وتقاليده ، قعد يفكر فيها ويضحك ، واهو يتذكر الايام الحلوة اللي كانت هناك مع ربعه .. اييييييييييه يا زينج يا كويت ويازين اهلج ..
صج ولهت عالديره واللي فيها ..

عبدالمحسن شاب طويل ، ابيضاني على اسمر يعني لونه متغير من الشمس ، طويل ، شعره شوي كستنائي على امه ، عنده غمازة ، عيونه عسليه ، وعنده سكسوكه صغيره تحت حلجه ريال بمعنى الكلمه ، وعمره 24 سنه ،،

قعد عالسرير وبيده صور الجامعه ، رتب الصور بالالبوم ورتب اغراضه وانسدح عشان ينام .. شوي ولا يوصل له مسج (( يا صاحبي جيت ابشكي لك من احوالي .. جيت ومدامك رفيجي ليه اطولها ))
كان المسج من فهد ولد عمه محمد ،، على طول عبدالمحسن اتصل على فهد يبي يشوف شنو عنده ..
محسن : الو خير خير ؟؟
فهد : بسم الله .. الناس تسلم اول ،، الخير بويهك .. بغيت اكلمك عن نور ،، تذكرها ولا نسيتها من هالشقر ههه !
محسن واهو ناسي : منو نور ؟ ايييييييييييه الله يذكرها بالخير شلونها ؟ بنت الامريكيه مو جذي ؟
فهد : أي هذي اهي .. ملكه القلب والروح ،، صارت لها سالفه طويله قبل لاترد وتمنيتك تكون موجود اشتكي لك بس الحمدلله كل شي صار اوكي والحمدلله الحين احنا بخير
محسن : شسالفه ؟
فهد قعد يقول حق محسن السالفه كلها
محسن : خطاكم السو يا خوي والله مادري ..
فهد : خطاك اللاش .. المهم مو هذا الموضوع اللي ياي اكلمك فيه .. انا ياي استشيرك قاعد افكر اتقدم لها بس تتوقع اهلي يرضون فيها ؟
محسن : واهيا ناقصها شي ؟ ما شاء الله عليها من وصفك باين انها كامله والكامل الله
فهد : يعني تعتقد انهم عادي ماراح يعارضون كون الام امريكيه ؟
محسن : ان شاء الله لأ
فهد : الله يسمع منك ،، بو حسنا والله انك اكثر من اخوي ،،
محسن اللي قلبه انقبض يوم سمع هالكلمه لانه اشتاق لولد عمه : وانت اكثر واكثر واكثر من اخو يا فهدووو

سكرو التلفون وفهد قعد يفكر بنور كالعاده كتب لها مسج ودزه (( نور دنياي ،، ادري انج نايمه يا عمري .. باجر بكلم اهلي عنج .. بخلي امي تكلم امج وخلاص تصيرين لي بالحلال لاني مو قادر اصبر عليج ،، نوم العوافي يالملاك )) وبعد هالمسج نام فهد واهو مرتاح ..

يوم الاربعاء الساعه 2 الظهر .. فبيت محمد الهارفي ..
جود : يما انا بروح اشوف لي نفنوف حق ملكه فطوم اخت امينه رفيجتي .. باخذ شهدوه وياي ،،
ام فهد : لا الجود لا تروحون بروحكم خل فهيد يوديكم ..
جود : يما احنا مو يهال يالله عاااد .. فهيد يحن علينا وما يخلينا نشتري على راحتنا .
ام فهد : اففف منج يالجود لا صرتي ياهل .. خلاص ماشي ماشي روحو
جود واهيا تصفق مستانسه : هيــــــــــــــّا ,, تحيا السلطات العليا ..
ام فهد : فارجي جودوووو ههههههههه

فهد نازل من الدري رايح يسولف مع امه .. وجود صعدت فوق تبدل هدومها وتقول حق شهوده تبدل عشان يطلعون .. ودزت حق مصعب مسج عشان تستأذنه .. لكنها استغربت منه انه ما رد !! على طول يا فبالها انه ما عنده رصيد وتناست السالفه

فهد بالصاله : يما يالغاليه شرايج بولدج
ام فهد مستغربه : جنه البخت
فهد : اشوه
ام فهد : عندك شي صح ؟؟ اخلص قول عارفتلك
فهد : احم احم .. لا ماكو شي يمه بس ياي ادردش وياج
ام فهد : شصاير عليك هاليومين اما متضايق او فرحان !!
فهد : يما .. خلج من هالسالفه ،، شرايج بولدج ولــد الـ 23 ربيعًا لو تزوج ؟
ام فهد بفرحه : هذي الساعه المباركه ومنو سعيده الحظ
فهد : والله وحده يما عجبتني
ام فهد : شلون عرفتها ؟؟
فهد ارتبك ما كان حاسب حساب حق هالسؤال : شسمه .. أأ .. يما اللي يبي يتزوج يعرف شلون ..
ام فهد : خلاص ياولدي نكلم ابوك ونروح نخطبها لك ..
فهد : يما بس في مشكله ،، تره امها امريكيه
ام فهد : لو كانت بنت حمايل وخوش وحده وانت شاريها ماعندنا مانع انا وابوك بس خل السالفه بعد عرس فاطمه اخت امينه رفيجه جودي .
فهد : ان شاااااااااااااااااااااااااااء الله من عيوني .. أي اوامر ثانيه ؟؟؟
ام فهد : سلامتك ههههه
فهد طار من الوناسه يوم شاف اهله موافقين .
وصعد فوق ولا نور دازتله مسج (( حياتي احرجتني ،، بس سو اللي يريحك.. والله يوفقنا ان شاء الله .. اموت عليك ))

جود كانت بدارها تفكر بمصعب ومستغربه لانه ما رد على المسج .. وتوها خلصت من لبس هدومها ،، لبست تنوره سودا فيها زخرفه بيضه من (انوتا) وبدي اسور وقلاده طويله بيضه وحزام ابيض .. شكلها كان كلاسك
شوي ولا شهوده تدخل غرفه جود ..
شهد : جووود يالله عاد شنو هذا ؟؟ طولنا
جود: خلاص يالله نزلي السياره الحين انا يايه .
شهد كانت لابسه تنوره قصيره بيج فاتح .. وبدي بني عليه كتابه بالبيج .. وفاله شعرها ورافعه جزء منه مسويته (buff) كان شكلها برئ

طلعو من البيت وراحو المهلب .. قعدو يدورون نفانيف حق الملكه .. لين ما لقوو بعد ما طلعت روحهم ...
وردو البيت .. جود لمن ردت البيت طرشت مسج حق مصعب (( حياتي انا وصلت .. وينك يا عمري طمني عليك .. جود ))

ظلت تنطره بس بدون رد .. اتصلت عليه ما كان يرد ..
من طرف ثاني فبيت مصعب .. مصعب كان بغرفته صار له يومين مايتغدا ولا يتعشى كان حابس نفسه بالغرفه ،، كان يقرا مسجات نور ومتحسر عليها .. متضايق من حاله .. ومن ظلمه للبنت .. كان الموت بعينه احسن من الحياة بدونها ..
مصعب اخيرا قرر يتصل على واحد من ربعه يقوله عن ضيقته .. دور بالارقام .. حرف العين ..
ع .. ع .. عبدالله .. عبد الرحمن .. عبدالكريم .. عبدالمحسن اييييه هذا اهوا محسن ماكو غيره .. بس مادري اذا رد الكويت ولا لأ ..

مصعب : السلام عليكم
محسن : وعليكم السلام هلااااااااااااااا مصعبوووو
مصعب : والله ما عرفت صووووتك شلوووونك يالقاااااااااطع .. والله لك وحشه
محسن : تمام والله انت اكثر .. ولا تدري عن اخويييك ولا تتصل
مصعب : والله مادري انك رديت .. متى الوصول بالخير ؟؟
محسن : والله قبل جم يوم
مصعب : يالله الحمدلله على السلامه ،، مصعب انا يايلك بمووضوع مادري شنو رده فعلك بس جد مالقيت غيرك اشكي له
محسن واهو مخترع : خير مصعب شصاير ؟
مصعب : ياخوي انا حبيت لي وحده .. ادري انك بتنصدم ،، بس حبيتها من كل قلبي وكنت ابيها على سنه الله ورسوله ،، بس اللي صار اكبر مني ومنها .. السالفه ..
قعد مصعب يقول حق محسن السالفه وكان محسن مستمع جيد ..
محسن : والله يا مصعب دامك حاس انك هالكثر متعلق فيها حاول انك تصر على رايك .. وانت ريال لاتنسى يعني الكلمه الاولى والاخيره لك بروحك .. تدري شلون الحين بمرك بالتلفون ما ينفع
مصعب : خلاص .. صار

بنفس اللحظه جود كانت تتصل على مصعب .. بس بدون أي رد .. مصعب ماكان يبي يسمع صوتها لانه مو قادر على فراقها .. واذا سمع صوتها بيزيد الطين بله .. صار عنده تقريبا 6 مكالمات لم يرد عليها ..
اااااااخ يا جود القلب .. ااااااخ يا مملكه حبي .. قبل ارد قبل لا تكمل الرنه والحين ما ارد .. اااااااااه يا زمن صج دنيا ..

فبيت نور ..
نور: Mom ,, Fahad told his Mother & she said there is no problem
ام نور : congratulation 7bebty .. he is very kind boy
نور : yes he is .. that’s why I love him
ام نور ظمت نور على صدرها ووصتها على نفسها اذا تزوجت .

فبيت ابو مشعل ..
امينه : فطوووووووووووم يالعروووسه خلاص باجر ملكتج .. اليوم كانت اخر بروفه حقج وكنتي صج حلوة طالعه ..
فاطمه بحيا : مشكوره بعد قلبي
مشعل : تره قبل شوي يابو الكوشه وحطوها وطلعت فضيعه اذا تبون تروحون تشوفونها روحو .. والدوانيه راح يكون الرياييل فيها .. اووووووووه تعالووو نسيت اعزم فهييييد
امينه : لا يكون توم كروز
مشعل واهو يسحب امينه من عنقوصتها : نعععععم ؟؟ شعرفج فيه ؟
امينه : يالهبل اخو جووود رفيجتي
مشعل : ايييييييه حبيبه القلب
امينه : اعقل واستح على ويهك هذي بنت عوايل .

راح مشعل بالحوش واتصل على فهد وعزمه على الملكه .. فهد رحب فيه ووعده انه يحضر.

عبدالمحسن وصل بيت مصعب ومصعب ركب معاه وطلعو .. راحو عالبحر يتمشون
قعدو على كراسي اللي قبال البحر ويسولفون ..
محسن : مصعب خلاص عاد ياصاحبي ماحب اشوفك جذي
مصعب : والله يا محسن احس بختنق .. ابيها ومو قادر اطولها ،، شسوي ؟
محسن : صدقني لو الله كاتبها لك راح يجمعكم .. ولا تنســــ ..
قاطع كلامه صوت مسج من موبايل مصعب ..

مدري زعل ولا علينا تكبرت // يالصاحب اللي ما لقينا بديله
ماتدري انك بالحشا كم دمرت // قلبن يعدك يا خليلي خليله
ياكم من شانك من الشعر سطرت // من القصايد والحروف الجزيله
دخلت قلبي بلا دعوة ووكرت // ماخفت من اهلن وراي وقبيله
منت بشاطر ولكنك تشطرت // ملكت قلبي بين يومن وليله
فقدتك مصعب ..

مصعب دمعت عينه ونزل راسه .. محسن التفت على مصعب..
محسن : حبيبتك ؟
مصعب : هذا قلبي .
محسن : حاول تصير اقوا
مصعب : حاولت بس الحب غلبني
محسن : بس انت اكبر وانا متأكد
مصعب : الكبر لله وكلنا صغار

محسن قام يمسح على ظهر رفيجه اللي اول مره يشوفه بهالضعف .. وحاول يهديه ... لكن احيانا تكون الدموع ابلغ من أي تعبير ..

ردو البيت ،، مصعب رد داره حس انه شوي مرتاح اكثر لانه لقا من يشكي له وحط راسه وناااااام .. نام واهو يحلم بشوفه جود .. مملكه عمره .. مملكته جود ..

يوم الخميس الساعه 3 العصر
ابو فهد : جووود جووووووود ..
جود : هلاااااا يبا (ونزلت تركض على الدري .. )
ابو فهد : امج راح صوتها تناديج
جود : خير يما
ام فهد : جودي روحي انتي واختج بروحكم واعتذري حق ام مشعل ماقدر ايي لاني شوي تعبانه
جود : ماشي .. سلامتج يما
ام فهد :الله يسلمج
جود صعدت فوق لبست عباتها وخذت شهد وراحو الصالون عشان الميك اب والتسريحه ،، جود كانت تتمنى يكون مصعب معاها بهاليوم .. بس الظروف كانت مفرقتهم عن بعض ..

فهد : الو قوة حسووون
محسن : هلا فهيييد شعندك ؟
فهد : اتيي معاي ملكه اخت مشيعل ؟؟
محسن :مشعل بدر؟
فهد : أي ما غيره
محسن : والله ماعتقد اقدر انا ويا واحد من ربعي الحين ويا مصعب.
فهد : أي عادي يبه معاك
محسن : خلاص ماشي

سكر محسن التلفون ..
محسن : مصعبو اليوم معزوم انت عرس واحد من جماعتنا
مصعب : لا يبا فشله من صجك ماعرفهم ايي جذي جني مضاف اليه ..
محسن : لايبا انا وياك وبعرفك على ولد عمي فهيد الهارفي
مصعب : خلاص ماشي ... نعععععععمم ؟؟؟ شسمه ؟؟ فهد ؟ شنو ؟
محسن : الهارفي !! شفيك ؟ في احد تعرفه من عيال الهارفي
مصعب : لالا ماكو شي بس على بالي عايله ثانيه خلاص ان شاء الله اليوم ايي معاك وبالمره اونس نفسي
مصعب سرح بخياله بعيييييييد ،، وقال الله بس لو يطلع هذا اخوها اكون من اكثر الناس المحضوضين بالعالم ..

بيت بو مشعل كانو معتفسين يجهزون حق العرس
جود وشهد كانو يتجهزون بغرفهم ،،

الساعه 8.30 بالليل
فهد خذا خواته جود وشهد وراحو العرس ،، وومحسن ومصعب كشخو وراحو العرس

بالعرس ..
دخلت جود مع اختها شهد ،، الكل انبهر من جمالهم ..
كانت جود لابسه نفنوف اسودوفيه فتحه من جدام لين فوق الركبه .. ومن ورا هم كان مفتوح لين اخر ظهرها على شكل قلب حب واكنت فاله شعرها الاسود .. ورافعه شوي منه بطريقه روعه .. مكياجها كان ليلي غامج يناسب الاعراس .. وكانت سندريلا الحفله ..

شهد كانت لابسه نفنوف مشمشي قصير علاق من فوق وفيه شك ناعم .. وفاله شعرها وشوي مسويته كيرلي عالخفيف .. كانت نعومه .. وهاديه ..

امينه كان شكلها وايد راقي لابسه نفنوق احمر طويل قصه على الصدر وعاري من الظهر ..

حطو اغنيه سود العيون .. وطبعا اهداء من امينه لجود .. جود رقصت عليها .. وابهرت الكل بجمالها ..
استأذنت امينه عشان تروح تعدل نفسها عند المغاسل لان بسرداب بيت امينه مافي جامات ..

صعدت فوق وراحت صوب الجامات اللي على اليمين ..

بالدوانيه كانو الرياييل يدخلون يباركون حق المعرس وابو المعرس اوبو العروسه ... ودخل محسن ومصعب بعد فهد اللي كان سابقهم من نص ساعه وسلمو على الكل ووقفو يم فهد ..
طبعا الرياييل كانو كلهم دشاديش ورزه .. فهد تعرف على مصعب وحبه لانه كان خوش ريال وطيب .. وعرفه على مشعل اخو امينه .. مصعب استأذن من مشعل وسأله عن الحمامات .. فوصف له وين
طله مصعب ماشي واهو منزل راسه ووصل لين الحمام اللي كان جدامه مغاسل
رفع عينه .. جـــــــــــــــــــــــــــــود !!

تمـ الجزء الخامس

02-08-2008, 03:53 AM

الجزء السادس

انصدم مصعب من اللي شافه ،، جـــــــــــــــــــــــــــود !!
جود ماعرفت شنو تسوي انخشت ورا باب الحمام .. واهي تبجي .. مصعب !!

مصعب تحنط بمكانه ماعرف شنو يسوي يدخل الحمام ولا يرد الدوانيه .. ظل واقف مكانه .. لين انحلت عقده لسانه ..

مصعب : اسف .. مادريت انج هني قالو لي ان حمامات الريايل هني ..
جود كانت ورا باب الحمام تبجي .. شافها جذي .. بعد هالغيبه شافها جذي بدون لا شيله ولا عبايه ..
اشتقت له .. وين كان كل هالفتره .. كاهو جدامي مافيه شي بس ليش هجرني ؟ اكرهه ،، بس كثر كرهي له احبه
دموعها كانت ماليه عينها .. كانت تمسحهم لانها متبي احد يلاحظ ..
مصعب : جود حياتي انا مريت بظروف الله يعلم فيها .. خلتني اهتز ..
حس بصوت جود واهي تبجي قرب من باب الحمام ..
طلع ورقه وكتب عليها جم كلمه وباس الورقه
دخل ايده من ورا الباب وعطاها الورقه ..
واهو ماشي ولا فهد يطلع بويهه : مصعب وينك فيه ؟؟ شنو كنت تكلم احد !!!
جود تجمد الدم بعروقها لمن سمعت صوت فهد .. فهد يعرف مصعب .. لايكون مصعب مايدري انه اخوي .. لايكون سمع صوتي .. لايكون درى اني موجوده .. جود كانت ميته خوووف ..

مصعب : لاياخوي مافي شي بس كنت اتكلم بالتلفون .. يالله خل ندخل الدوانيه .
فهد : لا انا بدخل الحمام اول
مصعب : الا اقولك بغيت اسألك ممكن شوي اتيي وياي بوريك شغله اسألك عنها
(( واشر ورا ظهره حق جود عشان تطوف ))
ومشا مصعب مع فهد وقعد يسولف وياه .. ويتعرف عليه اكثر

جود نزلت بسرعه حق البنات تحت وسوت نفسها ان ما صار لها أي شي .. بس ملامحها كانت دايم تفضحها ..
شهد : جودي شفيج ؟
جود : ها .. ولا شي شهووده .. امشي نرقص ..
وراحت جود وشهدمع امينه يسولفون ويضحكون ..
شوي ولا تنزل العروسه فاطمه .. كانت حلوة وناعمه .. بس كانت ميته خوف .. ومرتبكه البنات لمن شافوها تنهدو وتمنو يكونون مكانها .. جود قعدت تدعي ان الله يجمعها ويا مصعب بهاليوم .. بالحلال ..

مصعب كان باله منشغل بجود .. ملاك يمشي عالارض .. قطعه من القمر .. ولا القمر كله .. لا لا اكيد هذي مو بشر .. هذي ملاك او هديه من عالم الاحلام..
قعد اغلب الوقت يسولف مع فهد يبي يعرف شنو قرابته من جود ...
مصعب : فهد عندك اخوان ؟
فهد : انا الوحيد وخواتي 3 .
مصعب : اها . عيل اعتبرني اخوك وهذا رقمي *******
فهد بابتسامه : تسلم يا خوي

الساعه 12 بالليل فهد دق على جود
فهد : جودي يالله بنمشي لبسي عباتج وخل شهود تلبس جكيتها ويالله بنرد البيت .
جود : ان شاء الله

مصعب وعبدالمحسن طلعو من الساعه 11وربع وكلن راح بيته

طلعو كلهم من العرس وكلن رد بيته ..
الجود صعدت دارها وارتمت على السرير قعدت تفكر باللي صار اليوم .. شلون اصلن يعرف امينه ؟؟ ومعقوله يصير لهم .. بس لا مستحيل ، مصعب بدوي وامينه حضريه ،، فديته هالبدوي .. بس شلون عرفهم ؟ يعني يعرف اخوي !! ماكو غير جذي .. يعرف مصعب اخوي ..
وقفت جود وقعدت تطالع نفسها بالمنظره ، ومتضايقه ليش شافها جذي ،، قاطع تفكيرها صوت الموبايل ..
(( تدري اني موت احبك .. وان مالي غير حبك .. واللي ينبض في ضلوعي .. ماهو قلبي هذا قلبك .. تدريـ منـ .. )) كان المتصل (( غرام جود)) جود كانت مغيره اسم مصعب بموبايله لهالاسم .. لانها صج قامت تحبه .. ترددت جود ترد ولا لأ ،،

مصعب : ألو .
جود : الو هلا مصعب
مصعب : هلا بالقمر اللي انبهرت بجماله .
جود واهي منحرجه وتأكدت انه شافها عدل : تسلم
مصعب : جودي شلونج ؟
جود : انا بخير .. بس
مصعب :لا بس ولا شي انا ادري شنو بتقولين ،، عن اللي صار صح ؟ عني انا صح ؟
جود : أي مصعب شصار تكفا فهمني .. انا غلطت بشي ؟؟
مصعب : اااااااااخ لو كل الناس مثلج جان الدنيا بخير .. جودي حياتي مادري شلون ابدي معاج بالموضوع ..
مصعب قعد يقول حق جود الموضوع ،،
ماقدرت جود تمسك نفسها وقعدت تبجي : مصعب ليش ؟؟ انزين انت تكلم قول شي
مصعب : جودي تكفين مابيج تبجين ،، ماقدر على دموعج .. ماقدر اخرب هالويه الملائكي بالدموع . تكفين مابي اسمع صوتج جذي
جود واهي تتنهد : بس مصعب انا شبه انتهيت من حياتك وخلاص مالنا مفر من السالفه
مصعب : اوعدج ياجود اني انهي هالموضوع بأسرع فرصه يا حياتي ،، بس مابيج تبجين ،، ووعد ان شاء الله خلال اليومين اليايين انا اصك الموضوع . واتقدم لج ،، بعد شتبين اكثر
جود اللي ارتاحت من كلام مصعب : ان شاء الله ،،
مصعب : بس انا خايف من شي .
جود : من شنو ياعمري ؟
مصعب : خايف اهلج يرفضون لو تقدمت لج
جود ودخل بقلبها نفس الخوف : ان شاء الله لأ ,, وبعدين انا اللي بتزوج مو غيري
مصعب : الله يجمعنا على خير ان شاء الله
جود ان شاء الله ،، عمري تاخر الوقت وانا لي الحين ما بدلت ملابسي
مصعب بشطانه : ملابسج العرس ؟؟
جود بخجل : أي
مصعب : اااااااخ يا قلبي ،،، ملاك مو بنت
جود بدلع : بااس عاد
مصعب واهو يقلد جود : باس عاد .. يا حبي لج يا ملاكي ،، يالله تصبحين على خير
جود : وانت من اهله عمري

سكرو التلفون وكل واحد منهم يفكر بالثاني .. لين نامو ،،،

يوم الاحد في بيت بو فهد الهارفي ..
ابو فهد : فهد يالله خلصنا ،، ولا غيرت رايك ماتبي تخطب البنت
فهد: لا يبا تكفا والله كاني نازل الحين
جود : أي جذي السنع يافهيد ،، زين سويت لقيت لك بنت تتزوجها ،، ملينا يبا نبي عرس
فهد : رجاءا هذي مو بنت .. هذي ملاك في هيئه بشر

جود راح بالها على مصعب وتذكرت كلمته لمن يقولها ملاك : يارب تجمعنا بالحلال يا مصعب
فهد : جووودوو .. وين وصلتي !! شفيج سرحانه
شهد : تفكر بحبيب القلب ،، الاظهر اختي عاشقه
جود : اسم الله علي
فهد: شهدو قصري لسانج لا اقصه لج
بو فهد : فهيدوو خلاص يبا هوننا ما راح نروح
فهد : لا يبا كاااااااني الحين انا بحضنك اوصل
بو فهد : اعقل وانزل لا اصعد لك .
فهد نزل واهو كاشخ اخر كشخه والعطر يفوح منه .. اخيرررررا من صبر نال ،، رايح حق حبيبه القلب نورر .. نور حياته ،، بتصير ملكه اليوم .. الله على الشعور .

فبيت نور ..
ام نور : come on Nour .. they will come soon & u didn’t finish
نور: Ok Mam .. I'll wear my shoes & I'll finish
ام نور : Ok I'll be waiting for u in my room

نور كانت كاشخه كانت لابسه تنوره قصيره تركوازي فاتح وتوب ابيض فيه شرايط بسيطه تركوازيه من لون التنوره كانت فاله شعرها الاشقر وحاطه مكياج بسيط يناسب ويهها الاجنبي وكعب خيوطه تلف على ساقها ..
كان شكلها ناعم حيل وجرئ ..

وصلو عايله بو فهد .. وتمت الخطبه ..وأخيرا ،، الحب انتهى نهايته الصحيحه ،، حب 4 سنين انتهى بالزواج اللي يجمعهم تحت سقف واحد بالحلال .. فهد ونور كانو طايرين من الفرحه ومو عارفين شلون يعبرون عن فرحهم ..

فبيت ابو مصعب ..
ابو مصعب : قلت لك بنت عمك وانتهى .
مصعب : يبا وراسي ان بنت عمي مستحيل اقبل فيها ..
ابو مصعب : مو بكيفك مصعب مو بكيفك .. انا ابوك وكلمتي تمشي عليك لو شنو تسوي .
مصعب : يبا هذا زواج مو لعبه انا مابي اخذ بنت الناس واظلمها معاي
ابو مصعب : الحب بعد الزواج وانا متأكد انك راح تحبها .
مصعب : ماراح اتزوجها عشان احبها انا اصلن .
ابو مصعب : انت ما يفيد معاك الحجي وانا ان شاء الله الاسبوع الياي مكلم عمك ..

فبيت ابو مشعل ..
فاطمه : يما لا تبجين خلاص .. انا مو مسافره جهاد .. انا رايحه شهر العسل ويا ريلي وراده ..
ام مشعل : بس والله مادري شلون اقوم الصبح بدون ما اشوفج بالبيت
امينه : فطوم ميخالف امي تتدلع علينا . فديتها امي
مشعل واهو متضايق : فطيموووو يعني بتروحين وتخلينا
فاطمه : واي انتو شفيكم والله تخلوني ابجي الحين معاكم انا بروح شهر العسل وبرد ،، بدال ما تتمنون لي الحين تبجون
ابو مشعل : يالله يا بنيتي ريلج واقف بره حرام ينطرج
فاطمه واهي تبوس راس امها : يالله يما توصين على شي ؟
ام مشعل واهي تمسح دموعها : سلامتج حبيبتي ديري بالج على نفسج

سلمت فاطمه على الكل .. وطبعا ما قدرت تمسك نفسها عن البجي .. وراحت مع زوجها المطار لانهم رايحين شهر العسل ..

مرت الايام .. وكل يوم يزيد حب جود لمصعب وحب مصعب حق جود ،، اما فهد ونور كانو عايشين الحب على اصوله .. وحددو موعد العرس ..

يوم الاربعاء في عرس فهد ونور ..
جود : شهووووود يالله قومي الساعه 11 يالله بنروح الصالون ويا نور قومي يالله
شهد بصوت نايم : هاااا .. انزين انزين بقوم ..
جود : يالله فزي قوومي تره انتي الوحيده اللي مو مبدله ..
ام فهد : جووووود .. يالله ما خلصتو ؟؟
جود: ان شاء الله يما بس شهوده تبدل وننزل
قامت شهد وبدلت وراحو الصالون ،، بالصالون كانت نور وام نور هناك وطبعا قاعدين يجهزون العروسه ،، لين الساعه 7 المغرب .. ام فهد وبناتها راحو الصاله عشان المعازيم بيوصلون ،، كانو كلهم لاهين بالعرس ، وبين انغام الموسيقى والرقص والتصفيق .. جود كانت بعيد عن الازعاج قالت حق المصورة تاخذ لها جم صورة ولا يرن تلفون جود .. كن المتصل مصعب

مصعب بصوت متضايق : هلا يا روحي
جود : هلا مصعب
مصعب واهو ناسي ان عرس اخوها اليوم : جودي وينج ؟
جود : عمري بعرس اخوي فهد ،، ليش نسيت
مصعب : اوووووووه نسيت حدي ،، عاد والله فهود عزمني على عرسه بس والله راحت عن بالي
جود : ماراح تروح يعني حبيبي ؟
مصعب : مادري .. تقترحين علي اروح ؟
جود : كيفك عمري
مصعب واهو يضحك مع ان اللي بداخله حيل متضايق :من صجج اكيد راح ايي ولا بعد راح ادش صاله الحريم مع فهوود ابي اشوف البنات
جود واهي معصبه وغيرانه : نعممممم ؟؟
مصعب : أي شفيج ؟؟ انتي حارمتني من البنات ومعلقتني فيج فماكو غير هالفرصه اشوفهم فيها
جود : أي خلاص ميخالف ادخل وما اوصيك ييب وياك وايد شباب عشان اشوف اللي يعجبني منهم
مصعب : اشلع عيونج
جود واهي تضحك : ههههههههه .. وعادي عندك حبيبتك تصير عميا
مصعب : بسم الله عليها ،، فديتها بعيوني حبيبتي
جود استحت : فديت اللي يتفداني
مصعب : يالله اخليج انا الحين الحريم بعد يقولون انج رحتي عنهم .
جود : ماشي حبيبي خلاص براحتك

مصعب صك التلفون واهو متضايق .. كان يبي يكلمها بموضوع .. بس ماكان الوقت مناسب
راح مصعب العرس وبارك حق فهد وطبعا كان محسن طاير من الفرح حق ولد عمه ،،
يا الوقت اللي يزفون المعرس لعروسته ..
على اصوات الطيران .. والموسيقى شايله صاله الحريم دخل فهد مع ابوه وعمه وعم نور (لان ابوها متوفي ) مصعب ومحسن ومشعل كانو ورا فهد على طول ،، مصعب كان يدور جود بعيونه بين الحريم .. لين لمحها واقفه على جنب ومتغطيه مو مبين منها الا ويهها مصعب ارتااااح يوم شافها .. ومن شاف القمر ليش ما يرتاح!!

خلص العرس ويت الليموزين تاخذ المعرس وعروسته ..
الكل كان مستانس وام فهد عيونها كل ساعه تدمع من الفرحه على ولدها الوحيد .. ورغد اخت جود اللي كانت بايرلندا اتصلت على اخوها تبارك له واعتذرت له لانها ماتقدر اتيي ..

الكل رد بيته ويتكلم عن جمال العروسه الانقليزي .. ووسامه فهد ،، البنات كلهم يتمنون الله يرزقهم بريال عنده ولو نص جمال فهد ..

يوم الجمعه ..
ابو مصعب : مصعب انا كلمت ابو البنت وان شاء الله الاحد الملكه
مصعب منصدم : .........
ابو مصعب : شفيك ساكت ،، لاتصير لي حرمه جاوب
مصعب : يبا انا رايي وقلته ،، وانت تبي تحطم حياتي
ابو مصعب : انت الكلام وياك ضايع ،، تزهب الاحد الملجه .. لا تسوي نفسك منصدم لاني خاطبها لك من اسبوع . والملجه بتكون بس كتب كتاب وماله داعي حفلات وطقطقه

مصعب دارت فيه الدنيا ملكه ؟؟؟؟؟ شلون ؟ ومتى خطبها وشلون وافقت .. مستحيل ارضى فيها مابيها مستحيل اقبل فيها لا .. مستحيل .. انزين وجود ؟؟ غلا روحي جود ؟؟ شلون راح اقولها وانا اللي وعدتها انها تكون لي!! انا احبها ومااقدر اتخلى عنها ..

مصعب مسك تلفونه واتصل على جود
جود بصوت باكي : لا انت تتغشمر حبيبي صح ؟
مصعب : جود والله هذا الواقع
جود : مستحيل مصعب لا مستحيل .. انت تحبني وانا احبك .. شلون تتخلى عني بهالسرعه ؟؟ انت وعدتني انك ما تتخلى عني ،، جذي تطلع وعودك جذب ..
مصعب : جود وربي اني شاريج بس هذي ظروفي وانا قاعد اقولج عنها ..
جود : الحب اقوا من الظروف بس انت ماتبيني .. انت ما تحبني انت تخليت عن حلمنا خلاص روح .. انت انتهيت من حياتي روح تزوج وخلني بروحي .. مابي اكلمك مابي اشوف رقمك ،، كل شي منك بقطه .. هديتك اللي عطيتني اياها بعيد ميلادي تعال اخذها .. مسجاتك بمسحهم .. رقمك بنساه .. انت مثل باقي الشباب مافي فرق بينكم .. كلكم جذي ،، توعدون البنت وتخلونها ،، حسافه خنت اهلي عشانك ،، خنتهم لاني اعتبرتك غير بس خلاص اطلع من حياتي وروح ،،
كانت جود تبجي بكل قوة .. كان البجي ماخذ اكثر كلامها ،، ماقدرت تصمد جدامه ،، شافت حبها قاعد يختفي واهو اصلن توه بادي ..
مصعب : اللي تشوفينه جود .. بس تأكدي اني والله العظيم احبج وراح اظل احبج طول عمري .. اسف جود .. احبج .. مع السلامه
جود تمنته ما قالها تمنت انه يرد ويقول لها جود الله يخليج لا تتخلين عني بهالسهوله ،، بس اهو انسحب بهدوء بدون ما يجرح شعورها او يضايقها اكثر

جود ارتمت على السرير تبجي بكل مافيها .. تحبه بس خلاص انتهى من حياتها ،،
مصعب ليش سويت جذي ،، يارب من لي غيرك اشكي له .. يارب قدم اللي فيه خير يارب اجمعنا بالحلال يا رب .. انا احب مصعب في الله ،، يارب اجمعنا يارب يا كريم ..
جود تمنت ان فهد يكون موجود تلجأ له .. بس خلاص فهد راح .. تزوج وتركهم ،، الله يوفقك يا فهد .. راح اشتاق لك ياخوي .
جود ماقدرت تنام يومها ،،، ظلت لين طلوع الشمس صاحيه .. كانت تتحسر على كل الايام اللي كانت مع مصعب ..

مصعب اللي كان ميت من الضيق ،، حاول يقوي يقلبه .. حاول يطرد صوتها الباكي من باله وكلامها .. ماقدر ،، جود تبكي واهو السبب ..

يوم الاحد الساعه 5.30 العصر ..

ام مصعب : يالله بالبركه يولدي
مصعب والهم كله بويهه : يما .. انتو جنيتو علي
ام مصعب واهي حاسه بولدها : ان شاء الله الله يسعدك معاها ..
مصعب : مافي سعاده من بعد بنت الهارفي .
ام مصعب : تعوذ من بليس ويالله خل نمشي
ابو مصعب : يالله يالمعرس تعال ياولدي ،، اخيرا بفرح فيك
مصعب واهو يصطنع الابتسامه : تسلم يبه

وصل مصعب مع ابوه وامه بيت عمهم .. كان المــُلا موجود مع الشهود وكتبو الكتاب .
مبروك مصعب .. مبروك هدى .. الله يوفقكم

الكل بارك حق الزوجين ،، وتم هالزواج العائلي ،، الكل طلع من الغرفه وخلو مصعب مع هدى بروحهم ..
مصعب : مبروك هدى الله يقدرني واسعدج
هدى بنبره حزن : يبارك فيك ان شاء الله
مصعب : هدى وين تبين نتعشى اليوم ؟
هدى : خلنا بالبيت احسن خل نروح بيت ابوك .

مصعب استغرب من اسلوب هدى .. ما كانت مرتاحه كلش بهالزيجه .. ومو مبين عليها ملامح الفرح ..
مصعب اخذ هدى وراح بيت اهله لانهم راح يسكنون فبيت اهله ،، لان اهو وحيد امه وابوه والبيت خالي مافيه احد ،، وكان ابوه مخصص طابق حق مصعب ،، حاسب حسابه لي تزوج .
دخل مصعب البيت وصعد الطابق ماله .. ومعاه هدى كانت تمشي وراه .
وصعدو غرفتهم

جود كانت بالبيت قافله على نفسها الباب 3 ايام واهي مو ماكله شي وعايشه على المنشطات والبندول ..
ام فهد تطق الباب عليها ،، جود كانت اغلب الاحيان تتظاهر انها نايمه ، واذا بطلت الباب قالت لامها انها تدرس حق الجامعه لان الامتحانات قربت ..

رن تلفون جود : الووو
رغد : هااااااااااااااي .. شلونج جوووودووو
جود بابتسامه : زينه انتي شلونج رغوده ؟
رغد : انا بخير واي يالخايسه حدي ولهانه عليج
جود : توله عليج العافيه .. رغوده متى اتيين الكويت حدي مشتاقتلج
رغد : ان شاء الله بس يخلص مبارك هالكورس راح ازوركم .. تعالي شلون المعاريس ؟
جود : تصدقين مادري عنهم ما يلولنا لي الحين .. يمكن بعد شوي اييون .
رغد : سلمي عليهم .. وانا قبل شوي كلمت امي وابوي
جود : يوصل يالله باي
رغد : بايات

صكت جود التلفون وكانت تتمنى لو رغد كانت اقرب اكثر منها جان قدرت تشكي لها .. بس اااااه يا زمن
شوي ولا ميري اتيي تطق الباب على جود : جود بابا فهد تهت يبي انتي كولو يجي تهت بس انتي سوي يقعد فوووق
جود : اوكي خلاص انا نازله الحين

بدلت جود ملابسها بسرعه ولبست نفنوف قصير بطيخي بسيط ورفعت شعرها كله فوق.. ونزلت
فهد : حيا الله بالعروسه القادمه
جود : الله يحييك شلونك ؟
فهد : تمام الحمدلله ..
جود : وخر شوي خل اقعد مع مرت اخوي النور كله
نور : ثانك يو حبيبتي .. والله انتي النور مو انا
جود : لالا مايصير انتي النور كله اسم على مسمى
نور : احرجتيني .. شلونج الجود ؟؟
جود : تمام ..
شهد واهي تتلصق بمرت اخوها : مرت اخوي حبيبتي يالله نبي ياهل ابي اصير عمه .
فهد : ول ول ول عليج امس متزوجين تبينها باجر تحمل شدعووووه عليج !!
نور ضحكت واهي منحرجه وقرصت فهد بدون محد يحس
جود كانت ساكته وقاعده على غير عادتها .. اهيا دايما تكون اهيا اللي شايله الصاله ولا قعدت مع احد ماتخليه بحاله بس هالمره غير ، عقلها ويا مصعب اللي راح وخلاها ،، اكيد اهو الحين مع مرته ..
ابو فهد : جود يبا قومي يبي عصير حق اخوج ومرته ..
جود واهي تخز فهد : ان شاء الله يبا .. والله وقمنا نخدمك يافهيييييد..

جود راحت المطبخ شالت الصينيه .. فيها قلاصين عصير حق فهد ونور ..

فجـــأة

ميري : مداااااااااااااام .. تعالي شوفي جود مايدري شنو في هيا .. طاح على الارض
والطباخه روز راحت تركض حق الام ..

الكل قام من الصاله لمن سمعو جذي وكلهم راحو المطبخ يشوفون شفيها جود .. ولا يلقونها متمدده على الارض والصينيه يمها والقلاصات متكسره وايدها تنزف ..

تم الجزء السادس

02-08-2008, 05:08 AM

يااااااااعلي

ياحرام والله جووووووووود

كسررررررت خاطري حييييييييييل

بصييييييح الحين عليها

ومصعبووو الزفت رضى بالأمر الواقع

طيب كان قال حق بنت عمه انه مايبيها وخلآها ترفضه

يالله عقله مجمد يقول يحب جوود و عالفاضي.... قهرررررررني بقوووووة

حبيبتي شموووسة حدددددي متحمسة ابي اعرف شصار لجووود

وشبيصير حق زواج هالدبقة مع مصعب

...

الشئ الغريب ان توقعاتي كلها صارت بالعكس

فهد تزوج نور ومصعب ماتزوج جووود

بس مدري ليه حاسة ان خيرته بيتزوجها خخخخخخ

شمووووسة ياحيااااااتي انتي...... بلييييييييز نزلي البارت الجديد

ماني قادرة أنطر لين أنام وأجلس بعدين أعرف شصار

بلييييييييييز نزلي البارت الجديد...

لآتحرميني من حمااااسي

أنتظر بشغف

02-08-2008, 05:11 AM

اللهم صلِ على محمـد والـ محمد ]

اعتقدتها مجرد نقل لكاتب مميز .. بالفعل قلم مميز
لن اكذب بالقول اني قرأتها كامله ... هي نظرات خاطفه تنقلت بها بين الآسطر
اعجبني واذهلني جداً ما كان بها ..

[!] شمس خلف السح ــآب [!]
استمري يا مبدعهـ .. نحن معك

02-08-2008, 06:36 AM

انا اللي كاتبها مو ناقلتها وشكرا

02-08-2008, 06:40 AM

الجزء السابع

فهد شاف اخته جذي انصدم على طول قرب منها وشالها وام فهد تبجي ، فهد ركب السيارة وعلى طول توجه للمستشفى ، ام فهد ما قدرت تتماسك وقعدت تبجي وشهد اغمى عليها وبعد محاولات قدرو يصحونها .. ابو فهد اخذ اهله وراحو المستشفى ولحقو فهد ..

مصعب كان بالبيت مع مرته ، وكان يكلم محسن رفيجه ،،
محسن : انزين مصعبو ثواني وادق عليك بدق على فهد بشوفه اذا يبي ايي معانا ولا لآ .
مصعب : خلاص .. صار
محسن دق على فهد اللي كان بالسياره واعصابه منهاره على اخته ..
فهد باستعجال وربكه : الوو
محسن : هلا ولد عمي ..
فهد : محسن جود طاحت علينا وانا رايح المستشفى ماقدر اكلمك باي باي ..
محسن : خلاص انا ياي مع مصعب باي .. وطمني

محسن انصدم يوم سمع جذي ، جود وايد غاليه على محسن ،، فتأثر وايد
محسن : مصعب دقيت على فهيد يقول اخته طاحت عليهم ..
مصعب بارتباك : أي اخت ؟؟
محسن استغرب من السؤال بس من الخوف ماعرف شلون يتصرف : اخته الجود .
مصعب : تكفا انا ياي معاك دقيقتين واكون عندك .
محسن : تعال لي المستشفى ..

هدى : خير مصعب ؟؟ شصاير ؟
مصعب : مو وقتج .. انتي السبب وخري عني

هدى انصدمت .. شلون اهيا السبب ؟؟ شنو سوت اصلن ؟؟ مالها ذنب بولا شي !!
مصعب لبس دشداشته بسرعه وركب سيارته وطار المستشفى.
دق على محسن اللي كان واصل قبله وسأله وينهم وراح لهم ..
مصعب حس نفسه غلط بين هالعايله ،، انا شنو يايبني واهما كلهم اهل .. شاللي خلاني أجي !! بس الموضوع يخص جود .. مستحيل اخليها لو على موتي ..
مصعب كان واقف يم محسن ، ويدعي ان الله يستر ويشافي جود وما يطلع فيها شي جايد.

الدكتور طلع من عند جود : منو ولي امرها هني ؟
ابو فهد : انا .. ها دكتور بشر ؟
الدكتور خذا ابو فهد بروحه وكلمه .. ابو فهد اخترع من كلام الدكتور ..
ابو فهد : بس مستحيل .. البنت كان ما فيها شي
الدكتور : هذا قضاء الله وقدرة .

ابو فهد مشا عن الدكتور واهو متضايق وحاط الغتره على جتفه من التعب
ام فهد واهي تبجي : شفيها بنتي ؟؟
ابو فهد : ...........
شهد تمسح دموعها : يبا تكفا قول شفيها جود ؟؟
ابو فهد : جود طلع معاها فشل كلوي حاد ، واذا ما تحسنت الحاله خايفين يصير مزمن ويصير وايد خطر عليها وراح يضطرون يستأصلون الكليه .
فهد ومحسن : لا حول ولا قوة الا بالله .
مصعب اللي كان يسمع جذي حس انه فقد احساسه ،، حس انه اخر اماله بالدنيا راحو ..
مصعب : دكتور سوووو شي
فهد استغرب من رده فعل مصعب ، شفيه اخترع فجأة ؟؟
نور كانت واقفه يم فهد وماسه ايده .. كانت تحاتي جود ،، جود انسانه غير عن باقي البشر ، تدخل القلب من اول شوفه .. الله يشافيها
مصعب : دكتور تكفا حرام بنت مثل هذي يصير فيها اللي يصير ..
محسن : مصعب .. هدي هدي خلاص ان شاء الله بيسوي اللي يقدر عليه.
مصعب تدارك نفسه وحس انه وايد انفعل بس شيسوي ،، هذي روحه والروح غاليه ..
حاولت ام فهد تدخل على بنتها بس الدكتور منعها لانهم يبون حالتها تستقر ونصحهم لو يتركونها ويزورونها باجر ،،
الكل راح ..
مصعب ركب سيارته ورد البيت .. كان طول الطريج يفكر بـ جود ،،

وصل البيت ..
هدى والدموع ماليه عينها : مصعب وين رحت ؟؟
مصعب بدون اهتمام : صار عندي شغل وطلعت ظروري .
هدى بضيق : مالي حق اعرف ؟؟
مصعب : اووووه هدى لا تصيرين لي مادري شلون قايله ،، وخري وخلاص

مصعب كان شبهه منهار وراح قعد على الكرسي اللي بغرفه النوم .
هدى ما كانت من البنات اللي يحبون يشكون حق احد عن أي شي ،، مسحت دموعها بايدها وغسلت ويهها وبدلت هدومها عشان تنام .. طلعت نامت بالصاله ،، الله كريم .. اول ليله معاه وهذا حالي ، الله يصبرني ..

مصعب حس انه قسا على هدى ، شذنب هالمسكينه باللي قاعد يصير ، هذي مرتي ، انا ليش مو قادر افهم الواقع ؟ ليش مو قاعد اتقبل الموضوع .. جود مو لي ، ومستحيل اقدر اوضح لها موقفي ، وحتى لو قلت لها الحقيقه مستحيل تصدق ..

مصعب خذاه التفكير يمين ويسار ،، ما عرف شنو يسوي . طلع الصاله شاف هدى توها تبي تنسدح عشان تنام ،، قعد يمها .
مصعب : هدى انا اسف .
هدى : لا عادي مصعب
مصعب : هدى جد انا اسف وما كان قصدي اصرخ عليج او ازفج انتي مالج ذنب باللي صار بس هذا واحد عزيز علي وطاح بالمستشفى وطلع فيه فشل كلوي حاد .
هدى : ما يشوف شر ،، مصعب طلبتك ..
مصعب : سمي ..
هدى : سم الله عدوينك .. مصعب مابي انام عندك بالغرفه ، ابي انام بالصاله .
مصعب ارتاح لما حس ان الكلام طلع منها لان اهو بعد ما وده ينام يمها بسرير واحد : على امرج بس انتي روحي الدار وانا انام بالصاله .
هدى ابتسمت وحست براحه : مشكور .
مصعب : تصبحين على خير .
هدى : تلقى الخير . (( وراحت الغرفه ))

هدى انسدحت على الفراش تبي تنام ،، قعدت تبجي من قلب .. بهالاثناء مصعب حس بصوت بجي خفيف ،، فتح الغرفه عليها شوي شوي ولا يشوفها تبجي ، مصعب استغرب .. والله غريبين هالحريم انزين اهيا اللي طالبه مني انها تنام بروحها ليش تبجي !!
بدل مصعب هدومه وحط راسه على الغنفه ( الكنبه ) يت صوره جود فباله ،، وقعد يدعي ..
اسأل الله العظيم رب العرش العظيم ان يشفيها
اسأل الله العظيم رب العرش العظيم ان يشفيها
يارب انا عبدك ناصيتي بـيدك راضي في حكمك
يارب اذا كان شفاء جود خير لها فاشفها ..
يارب جود في امس الحاجه لك يارب

،، ياربي متى أيي الوقت المناسب واقول حق هدى الحقيقه !! يارب خفف علي اللي قاعد يصير ..

ماحس مصعب بالدنيا حوله ونام .. نام من بعد ما دعا حق حبه الاول والاخير جود ان الله يشفيها ..

فبيت ابو فهد ..
ام فهد تبجي : ياحظي على بنيتي .. شصار فيها شذنبها هالصغيره اللي ماتهنت بشبابها يصير فيها كل هذا
ابو فهد : ان شاء الله مافيها الا العافيه ،، انتي ادعي لها بدال هالحجي اللي ماله داعي .
ام فهد واهي تحاول تمسك بجيتها : الله يشافيها ..

شهد اول ما وصلو البيت صعدت دارها واهي تبجي ،، مع ان شهد دايما حاطه دوبها دوب جود لكنها تبقى اختها الغاليه ..

ثاني يوم الصبح ..
فهد قام الصبح بيروح حق اخته .. فهد ساكن فبيت ام نور لان ماعندها احد غير نور ولمن تزوجت نور ظلت بروحها فاقترحت عليهم يسكنون عندها
ام نور : give my love to JUDE please ,,
فهد : ok Aunt

طلع فهد من البيت وراح حق اخته المستشفى .. دخل عليها الغرفه ،،
جود كانت منسدحه وعلامات التعب باينه عليها ..
جود : هلا والله فهد
فهد : هلا فيج حبيبتي شلونج اليوم ؟
جود : تمام الحمدلله .. فهد شنو قالك الطبيب عني ؟
فهد ارتبك مو عارف شيقول : مافي شي جود بس وعكه صحيه
جود حست بربكه اخوها : فهد خاش عني شي صح ؟
فهد : لا أبد مافي شي
جود ماصدقت اخوها : الحمدلله ..
قاطع محادثتهم دخول ام فهد وابو فهد مع شهد ..
ام فهد ركضت وحضنت بنتها : سلامتج جووود حبيبتي ما تشوفين شر مالج شغل بكلام الدكتور مافيج شي ان شاء الله خرابيط دكاتر يقولـ ....
فهد : أي يما بس يخربط يقول وعكه صحيه
ويطالع امه ويغمز لها عشان ما تقول حق جود وتتدهور حالتها ..
جود: خاشين علي شي انتو والله في شي .. بس مادري شنو اهوا ،،، شهد عفيه قولي لي ؟؟
شهد : مافيج شي جود انتي شفيج تفاولين على نفسج

بهاللحظه رن تلفون شهد : الوو
الطرف الثاني : يازين الصوت
شهد : نعمـ ؟؟
الطرف الثاني : ها ما تبين سعاد لي الحين ؟؟
شهد : لو سمحت غلطان .
وسكرت شهد التلفون

فهد : منو ؟؟
شهد : مادري واحد يقولي ما تبين سعاد
فهد :اذا دق مره ثانيه عطيني اوريج شغل الله فيه

شهد ماتت خوف وتذكرت انها صح من زمان داقه عليه .. الله يسامحج يا اسراء الي طيحتيني بهالمشكله ..
ام فهد وكلت بنتها سلطه اهيا مسويتها لها من البيت و باستها على خدها وطلعوو ..
ظلت جود بالفراش بروحها ،،، جود مو من النوع اللي يحب يقعد بروحه فـ حست بضيق بروحها ..
رن تلفونها
امينه : جووووووووودي يالقاطعه اوريج انتي هين هين ...
جود بجديه وتعب : هلا امينه شلونج ؟
امينه خافت من صوت جود : جود شفيج ؟؟؟
جود : امونه انا بالمستشفى
امينه بصدمه : بالمستشفى ؟؟؟؟؟؟؟؟؟؟
جود : أي امس طحت عليهم .. تقدرين اتيين عندي متملله بروحي
امينه : بدون ما تسألين انا الحين يايه

امينه لبست جينز وجبنيز وكاب ايطالي وطلعت وراحت المستشفى حق جود
امينه : سلامااااااااات جودي ما تشوفين شر يا قلبي ..والله ما تستاهلين
جود : الله يسلمج حبيبتي .. امونه بكلمج بموضوع طويل بس اتمنى انج ما تزعلين علي لاني ما قلت لج اياه من البدايه .
امينه باستغراب : تفضلي ،، لا شدعوه انا ما ازعل على جودي
جود : تذكرين الصبي اللي ينيتي عليه وقلتي انه حلو ومادري شصار فيج عشانه اللي ياب لنا الورقه من زمان عند باب السيارة
امينه : هممممم .. ماذكـــر واللـ ... ايييييييييييه تذكرت تذكرت ،، شفيه ؟
جود : الورقه اللي كانت معاه كانت ورقه بياناتي وعرف عني كل شي ، صار عنده رقمي واسمي وكل البيانات اللي تخصني
امينه بخوف : وبعدين ؟؟
جود : ظل فتره يدز مسجات وبين لي انه خوش صبي ومو راعي خرابيط وسوالف ،، وو ..
امينه : جودي شفيج ؟؟
جود وعيونها مليانه دموع : وحبيته من كل قلبي ،، ووعدني انه يكون لي واكون له .. بس صارت له ظروف وابوه وقف بطريجنا ،، وجبره انه يتزوج بنت عمه .. وو ..
قعدت جود تبجي بحسره على حبيبها : والحين اكيد مع مرته ..يابختها يا امينه ،، يا بختها ..
امينه تأثرت بدموع رفيجتها وايد : جود عفيه لا تبجين .. هذا ما يستاهلج خليه يولي ،، مو كفو حب وموو كفو هالدموع عشانه ..
جود كانت تصرخ بداخلها ،، إلا مصعب مستحيل ارضى عليه هالكلام ،، مصعب راح مني لكنه ظل بقلبي ..
جود: امينه مو بيدنا اللي صار ، كان فوق طاقتي وطاقته.
امينه : عيل دامج عارفه خلاص عفيه مسحي هالدموع ..
امينه ظلت قاعده ويا جوود فتره لين خلتها تضحك .. ارتاحت جود لانها قالت لاحد اللي تحس فيه ..
استأذت امينه من جود ومشت ،،

فبيت ام نور ..
نور : فهود خل نروح نشوف نور اليوم
فهد : حياتي ،، خلص موعد الزيارة والوالد والوالده اليوم راحو وطمنوني .. شرايج نروح اليوم البحر نتمشي .. ولا تدرين اليووم ماكو طلعه .. هاهاهاااااي
نور عرفت شنو فهد قاصد ويهها صار طماطه : لااا موبي موبي .. نبي نطلع عفيه
فهد واهو يعاند نور : مافي طلعه ،، لا تحاولين اليوم انتي بقبضتي .. واشوف شلون تقدرين تنحاشين يا عصفورتي
نور استحت وبدلع : فهـــّادي خلاص عاد ..
فهد : فدييييييت الدلوعه ،، يا رب انا شلون قادر استحملج .. نورو عقلي احسن لج لا افترسج الحين هههههههه
نور : هههههههههه .. صج مينون ..
فهد : مينون الحب .. مينون نور ..

اما فبيت ابو مصعب كانت الاوضاع مختلفه ..
هدى والحزن كله بويهها : مصعب بكلمك بموضوع
مصعب واهو متعاطف مع هالمسكينه : امري هدى
هدى : تره الموضوع يبيله مخ صافي وما يبيله عصبيه
مصعب : امري ..
هدى وعيونها غورقت دمووع : انا ..
مصعب مسك ايدها : قولي لا تخافين انا ماراح اعصب
هدى : انا اهلى جبروني عليك ،، لو كانت امي الله يرحمها عايشه جان كل هذا ما صار (( وقعدت تجبي ))
مصعب حاشته صدمه .. هـــــــــــــــــــــدى مجبوره فيني ؟؟
زواجنا هذا اساسه ؟؟ كلنا ضحايا هالزواج ؟؟ زواج عائلي مرسوم على خطه ؟؟؟ ليييييش؟؟ ليش هالظلم ؟؟
مصعب : مجبوره ؟؟؟؟؟؟
هدى : ابوي اجبرني عليك وقال انك شاريني
مصعب قعد يكلم نفسه أأأأأأأأأأأأأأأأاخ يالقهر .. انا موشاري غير جود .. ااااااااااااااخ
مصعب : هدى .. هدى .. انا نفسج ،، صرت بموقف جبرني اني اخذج ..
هدى بصدمه : مصعب تكفا طلبتك .. طلقني ،،
مصعب منصدم : أطلقج ؟؟؟؟؟ وشنو يقولون الاهل عنا ؟؟ انا ما علي كلام انتي اللي راح تنظرين
هدى : ما علي من كلام الاهل ،، ولا كلام الناس .. اهما ما فكرو فيني يوم زوجوني اياك غصب .
مصعب : خليني افكر بالموضوع .
هدى : تكفا بسرعه فكر فيه وبسرعه عطني الرد
مصعب سكت فتره وقعد يفكر بكلامها .. يقدر يطلقها ؟؟ مــا أعتقد .. وكلام الاهل ؟
انزين شنو استفادتهم من هالزواج ؟؟ ليش حاوطونا بقيوده ؟!

اسأله وايد دارت فبال مصعب وترك لنفسه فرصه التفكير ،،

بعد 3 شهور .. وفي بيت محمد الهارفي... بالتحديد في غرفه جود ..
كانت جود منشغله بترتيب اوراقها .. وخاصتا انها بالفتره الاخيره بدت تشغل نفسها بالاشعار وبكتاباتها وتدريجيا بدا مصعب يطلع من حياتها .. مسكت جود قلم وورقه وبدت تكتب ..

حاورت مره دمعتن على الخد تنهال // منهو سببها وش اللي كان معنيها
جتلي تقولي سببها ناس على البال // من حبهم صارت وجناتي تفتديها
قاطعتها بصوتي ترى هذا محال // كيف الخدود تفتدي شي يشقيها
جاوبتني بصوت فيه نبره دلال // ياكيف ام(ن) تحتضن طفل عانيها
دمعتن هلت بعد احزان(ن) طوال // تخفف عن هموم شخص حاويها
دمعتن سالت ع الخد تسري باعتدال // ماغير تحكي عن حزن اللي يبكيها
يادموعي جاوبي بس لو سؤال // ليه كل ما بكيت بقلبي زادت معانيها
يادموعي خففي بالقلب نار الاشتعال // وللمواجع اهتفي للي بالحب يداويها
جفت دموعي وبالخفوق زاد الجدال // ياكيف دمعتن تزيح هموم باكيها

حطت القلم ،، ودخلت الورقه داخل دفتر كتاباتها وانسدحت عالفراش ،، رسايل مصعب لين الحين بموبايلها .. قعدت تقراهم ودموعها تمشي على خدودها ..
(( جود لا تخافين انا مستحيل افرط فيج .. وانا احبج وخلج متأكده من هالشي ))
ومسج ثاني
(( جود حياتي ،، الدنيا كلها ترخص لرضاج ،، احبج ))
وثالث ورابع وخامس ،،،،،،،،،

أأأأأأاه يا دنيا .. وينك يا مصعب ،، رحت وصارت حياتي صعبه بدونك .. ولهت عليك ،، ولهت عليك لحد الموت..
تذكرت جود شغله اهيا ناسيتها ..
الورقه اللي عطاها اياها مصعب ،، الورقه اللي مد ايده لها وعطاها يوم شافها بعرس فاطمه اخت امينه ..
شلون نستها واهي من حبيب القلب ،، اخ ياغبائج يا جود ،،

جود قعدت تدور الورقه وين حطتها ؟؟ وينها فيه ؟؟؟ ااااف من غبائي ،،، انا متأكده انها بالجنطه بس وين راحت .. قعدت جود تدور وتدور لين لقتها .. جود فتحت الورقه وقعدت تقرأ ،، مستحيل .. لأ ،، مستحيل يسوي جذي عشاني .. مصعب لاااااااااااااااااااااااا ...

فبيت ام نور .. الساعه 3.25 العصر
نور : فهد تكفا وخر عني لاعت جبدي من ويهك خلاص
فهد : نور شفيج ؟؟ مو طايقه تشوفين وهيي !! انا زوجج شدعوه جذي
نور : اوووه وخر عني تراك صاير قبيح وما تنشها وريحتك خايسه قوم تسبح
فهد : مليت من السباحه ،، تانكي البيت خلص والسبه سباحتي ،، نوري شفيج ،، تعالي لايكون حااااااامل
نور : حامل بويهك ،، أي حامل ؟؟ خبل انت
فهد : قومي خل نروح الطبيب يالله
نور : اففففففف ،، والله جنك ياهل ،، يالله نروح يالله بس فكني من حنتك اهم شي
فهد : ان شاء الله ماما . هههههههههههه ،، تعالي ما تبين تشمين ريحتي ؟؟
نور : وخر عني تكفا برجع على ويهك اذا قربت .
فهد : ههههههههه يالله خل نجرب يمكن تصير ريحتي حلوة ..

فهد خذا نور وراحو المستشفى ..
الدكتور : مبروووووووك المدام حامل ..
فهد : حا . . حا .. حااامل ،، يعني اناا بصير ابو محمد اخيراااااااااااا
نور تبتسم : مبروك ابو محمد ..
فهد ماحس بعمره وشالها وطيرااااااااااان لي السياره : فديييييييييييييييييييييييييييييييتج ــ مبروك يا احلى نور بالعالم كله ..
نور : يبارك فيك ،، بس عفيه لا تشيلني مره ثانيه لان شكلك خايس وريحتك تلوع الجبد .
فهد : وااااااي وااااااي يا زين تلوع الجبد من بؤؤؤج
نور يعني استحت : واي لا امبي ما اقدر استحي ،، فهدو خل نرد البيت وتكفا بطل الدرايش ريحه السيارة تلوع الجبد ..
فهد : على امرج يا ملكه .
ويبطل فهد الدرايش مالت السياره ويطول عالاغاني ويطق رقبه من الوناسه

جود كانت تقرا الورقه مو مستوعبه اللي مكتور ... شـــلون ؟؟
مستحيل مصعب يسويها ؟!!!!
حرام عليه !!!!!!!!

شنو هالورقه اللي عفست جود لهدرجه ؟؟
شنو مكتوب فيها ؟؟

تم الجزء السابع

02-08-2008, 06:42 AM

الجزء الثامن ..

قعدت جود تقرا الورقه اكثر من مره ، يمكن تقرا سطر غلط او شي من هالقبيل .. لكن الكلام كان واضح ..
(( جود ،، مادري اذا بتقرين الورقه الحين ولا بعدين .. لكن أي وقت تقرينها ابيج تركزين فيها عدل ..
جود من عرفتج انا ما فكرت فيج الا بالزينه ،، حياتي .. الامور مع ابوي قاعده تنحدر للأسوء ،، حياتي بدونج ولا شي ،، أعذريني اذا انهيت حياتي بيدي .. حبيبج .. مصعب ))

جود حست انها مو بالعالم ،، مصعب مستحيل يسويها .. مصعب يحبني ،، مصعب انسان مؤمن ومستحيل يفكر بالانتحار ..

فكرت جود وايد .. ادق عليه ؟؟ ولا ما ادق ؟؟ اخاف اهو الحين مع مرته .. بس خوفي راح من هالدنيــا .. اعوووذ بالله من هالافكار ..

مسكت جود التلفون وايدها ترجف .. طقت رقمه .. رن التلفون .. الحمدلله لك يارب .. مافيه شي ..
جود كانت تنطره يرد .. بس للأسف ،، ما شافت أي رد منه .. سكرت التلفون واهي متضايقه ،،
إييييييييييه .. من لقى احبابه نسى اصحابه .. الله يوفقه ،، كيفه اهو اللي خسرني ..

سكرت جود التلفون .. شوي ولا يرن تلفونها ..
: الو
جود : نعم ؟؟
: أأأ .. هذا مو رقم خالد ؟
جود : لا غلطان اخوي ..
: مع السلامه ,,

فبيت امينه ،،
مشعل : امينووو ،، تعالي شوفي لي بدله بطلع ..
امينه : يا سلام ومن متى انا اختار لك ؟
مشعل : من اليوم وطالع
امينه : يا سلام على الاخو البار بخواته !!
مشعل : امون يالله بليز تعالي كشخيني بضبط لي جم وحده اليوم ،، اللي عندي طقت جبدي منهم وابي يدد
امينه : الحمدلله والشكر لك يارب ،، ياربي لا تبلاني ،، اخو و نص عقله مادري منو لاحسه
مشعل : شنو قالو لج عقلي حلاو يلحسونه !!
امينه : وااااااااااااااااااااااااااي مليييييييييييييق اخوي ،، شارب بطل ملاقه ولا شسالفتك
مشعل : لا .. ولا شسالفتي .. كاااااااك .. يالله تعالي كشخيني وعقلي

امينه راحت دار اخوها تدور له هدوم يلبسها .. امينه كانت معروفه بذوقها باختيار هدوم الشباب ،، واغلب هدوم اخوانها اهيا تختارها لهم ..

طلعت امينه حق مشعل بنطلون لوو ويست جينز وقميص ابيض مخطط بخطوط بسيطه بالكحلي ،، وحزام يناسب القميص وقالت له انه يرفع شعره ويسويه سبايكي << بس شبايكي ذرب ،، يعني ماله داعي تخليه جنه احد مفجر براسك قنبله ..
لبس مشعل وكشخ وكان شوي معضل فكان القميص حلو عليه ومبين عضلات صدره .

مملكة جود ...(قصة كويتيه)

بوابة القصص والروايات